Colectivo Ecoloxista do Salnés

Trasladámonos

2009-05-31T01:15:00.003+02:00

O Blog do Colectivo Ecoloxista do Salnés trasládase cesalnes.wordpress.com. Esperamos atoparos por alí.

Observando as aves do Carreirón

2009-01-31T21:22:00.005+01:00

Achegamos unha fotografía da actividade aberta do Colectivo Ecoloxista do Salnés, titulada "As aves do Carreirón".

Xuntámonos arredor de vinte persoas coa fin de observar as aves acuáticas que se deixaran ver no litoral de Punta Carreirón, na Illa de Arousa.

Comezamos ás 10:30 e rematamos ao mediodía, disfrutando dunhas horas de sol bordeando toda a península de Carreirón.

Coa axuda de varios prismáticos e 4 telescopios vimos garzas e garzotas, gaivotas patiamarelas, gaivotas choronas, corvo mariño grande e corvo mariño cristado ademais de varias especies de limícolas. Destacou a observación de dous parrulos propios de augas salgadas: un mergo cristado e un parrulo pentumeiro, que non son doados de ver.

Ademais unha manda duns 12 arroases pasaron preto de nós.

Tamén recollimos algo de lixo e varias plantas pequenas de Uña de gato (Carpobrotus sp), unha planta invasora que coloniza a zona de duna, desplazando ás plantas propias.

Toda a actividade transcurriu nun ambiente agradable e sen incidentes.

Actividade de Xaneiro: As aves do Carreirón

2009-01-23T20:10:00.009+01:00

PERCORRIDO ORNITOLÓXICO POLA ILLA DE AROUSA

O sábado 31 de xaneiro ás 10:30 da mañá quedaremos na entrada do espazo natural de Punta Carreirón na Illa de Arousa.

Faremos un percorrido por esta interesante costa observando as aves mariñas na compañía dun ornitólogo, axudados de telescopios e prismáticos.

Se tes telescopio ou prismáticos lévao tamén. E calzado e roupa axeitada. ¡Anímate!

As actividades abertas mensuais son de balde. Non se precisa ser socio.

O Colectivo Ecoloxista do Salnés alega contra o PXOM de Meaño por considerar que incumple a lexislación

2009-01-12T14:52:00.002+01:00

O Colectivo Ecoloxista do Salnés ven de entregar no Concello de Meaño as alegacións correspondentes á revisión e ampliación do Plan Xeral de Ordenación Municipal (PXOM) de Meaño, así como ao Informe de Sostibilidade Ambiental (ISA) a el asociado.

Así, o CES elaborou dous documentos, presentados no rexistro do Concello o luns 29 de decembro:

- Un con 14 alegacións ao propio PXOM.

- Outro documento con 16 revisións e alegacións ao ISA deste PXOM.

Como conclusión global do CES, unha vez avaliados os Plans e Informes citados, é que este PXOM incumpre a lei do solo.

Cabe destacar certas reclamacións do CES con respecto a este Plan, como son:

- Con respecto á zona de desembocadura do río da Chanca, único litoral do municipio, espazo incluído na Rede Natura 2000, reclámase:

· Que nesta zona e arredores (dentro dos límites da protección costeira) non se promova o axardinamento e transformación desta paisaxe natural, e que todas as actuacións se adapten ao Decreto 127/08 de Humidais Protexidos de Galicia. Asimesmo, reclámase que se protexa a paisaxe agraria da zona como sinal de identidade. A este respecto, O CES propón actividades educativas e de restauración desta paisaxe.

· Que se aproveite a Planificación para realizar unha reordenación da industria alimentaria presente nesta zona (causante hoxe de verteduras ao humidal), apoiando o seu traslado (ás áreas industriais xa existentes ou ás previstas no propio PXOM).

· Que non se amplíe a pista litoral, favorecendo o seu uso peonil fronte aos vehículos a motor.

- Respectar as marxes de ribeira e a súa vexetación (evitando canalizacións e alteracións da canle e o ecosistema asociado), ante o seu papel como protección ante enchentes e na conservación de paisaxe e biodiversidade. En moitos casos, non se respecta a franxa de 100 m que contempla a lei do solo, como é o caso do polígono de Dadín ou en diversos puntos dos ríos da Chanca, Francón e Fondón. O CES reclama que a franxa de protección dos ríos se amplíe a 30 m como mínimo nos solos urbanos, como medida de protección fluvial e como previsión de inundacións nas beiras. Por exemplo, na confluencia dos ríos da Chanca e Fondón, zona con antecedentes de enchentes e alto risco de inundación, o PXOM prevé construír unha praza de abastos (mesmo sen ter solicitado os informes pertinentes a Augas de Galicia, incumprindo a Lei de Augas), actuación que o CES considera improcedente polo exposto.

- En canto á previsión do parque empresarial de Dadín, o CES considera que esta actuación debe ser revisada: o PXOM contempla a ampliación do polígono industrial da Pedreira, podendo ser suficiente para cubrir as necesidades existentes en canto a solo industrial (mesmo o actual polígono da Pedreira leva anos con parcelas desocupadas). Asimesmo, o CES presentou un estudo ornitolóxico da zona de Dadín afectada por dito polígono: este, ademais de afectar á rede hidrolóxica da zona, afectaría a máis de 100 especies diferentes de aves, incluíndo 51 especies de interese especial dentro do Catálogo Nacional de Especies Amenazadas, como a aguia cobreira (Circaetus gallicus) e o reiseñor (Luscinia megarhynchos).

- O cumprimento da Lei de ordenación urbanística 9/2002, en especial no que se refire á recalificación de zonas de solo rústico como solo urbano, evitando actuacións como as previstas para as inmediacións do núcleo de Dena, onde se contemplan recalificacións incompatibles coa lexislación vixente e impactando na paisaxe litoral de Meaño.

Con respecto ao Informe de Sostibilidade Ambiental (ISA), documento requirido pola Consellería de Medio Ambiente como ferramenta para acadar unha ordenación compatible co medio, o CES considera que o ISA presentado polo Concello non obedece a estes fins, senón a xustificar os impactos causados polo PXOM. Moitos destes exemplos están expostos anteriormente, casos para os que o ISA non achega alternativas nin medidas correctoras. No ISA débense cuantificar os efectos ambientais derivados da aplicación do PXOM; o CES considera que a valoración presente neste ISA é sempre xeral, pouco fundamentada e cun resultado infravalorado. Neste ISA, ademais, non se ven plasmadas algunhas recomendacións básicas da Consellería de Medio Ambiente, tan importantes como:

- Realizar un inventario das emisións contaminantes do municipio, e medidas preventivas.

- Establecer unha zona de transición na franxa litoral.

- Reducir o consumo enerxético e a contaminación luminosa do alumeado público.

- Prever solo para infraestruturas de enerxías renovables.

- Reservar espazos para implantar colectores de residuos.

- Prever espazos para a recollida de residuos valorizables e especiais, do agro e da industria.

- Recoller analítica dos puntos de vertido a ríos e costa, e establecer un sistema de control.

- Establecer no solo urbanizable unhas porcentaxes mínimas de zonas sen impermeabilizar.

- Mellorar os aspectos ambientais das comunicacións viarias.

O CES tamén considera que os sistemas de indicadores proposto no ISA para o Plan de Seguimento Ambiental do PXOM incumpre os preceptos marcados pola Consellería.

Así mesmo, o CES vai presentar estas alegacións ás consellerías competentes (Medio Ambiente e Ordenación Territorial) para que actúen ao respecto, evitando a aprobación do PXOM ata que se teñan en conta estes aspectos e se fagan as correccións pertinentes que permitan cumprir a forma e fondo da lexislación vixente.

O Salnés, a 10 de xaneiro de 2009.

A actividade en fotos

2008-12-14T21:34:00.004+01:00

Unhas imaxes do percorrido do sábado 13 por Feáns e A Siradella

Actividade mensual: Un tesouro en perigo

2008-12-13T00:17:00.002+01:00

RUTA POLA LADEIRA DE FEÁNS

Ven camiñar polos montes de Feáns e Siradella e descubrirás unha curiosa e ameazada duna trepadora.

Convidámoste a participar nun percorrido pola ladeira dos montes Feáns e Siradella (O Grove), na que afondaremos nos valores do lugar que corre o risco de ficar sepultado baixo o “green”, incluíndo unha curiosa formación dunar.

A cita é o sábado 13 de decembro, ás 10:30, no miradoiro da Siradella (O Grove).

Ven preparado con calzado e roupa adecuados para o monte.

Duración aproximada: 2 horas e media

Esta actividade é aberta, como xa sabedes, polo que todo aquel que desexe asistir será benvido.

Novamente recordarvos que para quen queira mercar lotaría de Nadal do CES, estará á venta ao comezo e remate desta actividade.

O Colectivo Ecoloxista do Salnés rexeita a proposta de Feáns como ubicación para un campo de golf

2008-12-08T22:00:00.002+01:00

En relación coas últimas propostas de iniciativa privada de realizar un campo de golf en Feáns (O Grove), o Colectivo Ecoloxista do Salnés quere manifestar a súa postura ao respecto:
O CES considera totalmente errado o emprazamento proposto para instalar un campo de golf: as faldas do monte Feáns, dentro dun espazo natural protexido con diversas figuras de protección:
➢ Zona de Especial Protección para as Aves (ZEPA) pola Unión Europea.
➢ Lugar de Importancia Comunitaria (LIC) pola UE.
➢ Humidal de Importancia Internacional polo Convenio Ramsar.
➢ Zona de Especial Protección dos Valores Naturais pola Consellería de Medio Ambiente.
Ademais, a Xunta de Galicia inclúe este espazo dentro dos eu Inventario de Humidais Protexidos, estando polo tanto tamén incluído no Inventario Español do Patrimonio Natural e da Biodiversidade.

A implantación do campo de golf nesta ubicación causaría diversos impactos:
- Perda de vexetación autóctona, causando afección a un medio tan valioso e singular como a duna rampante que sube en dirección á Siradella, con plantas de grande valor biolóxico debido á súa reducida área de distribución.
- Alteración da topografía dunar.
- Perda de hábitats de fauna autóctona protexida. A este respecto, cabe destacar que na zona proposta vive o sapo de esporóns (Pelobates cultripes), especie protexida e con distribución extremadamente reducida no territorio galego.
- Impacto paisaxístico, afectando a unha das mellores vistas naturais das Rías Baixas (dende a Siradella), visitado por milleiros de turistas cada ano e un dos mellores reclamos do municipio.
- Alteración severa do contorno por forte consumo de auga, e contaminación de aire, solo e augas por emprego de pesticidas.

Deste xeito, a instalación de dito campo incumpliría a lexislación vixente:
- Lei 42/07 do patrimonio natural e da biodiversidade, que recolle como infracción (art. 76.a) “la utilización de productos químicos (...) que alteren las condiciones de los ecosistemas con daño para los valores contenidos” e (art. 76.g) “la alteración de las condiciones de un espacio protegido, o de los productos propios de él mediante ocupación, roturación, corta, arranque u otras acciones”.
- O Decreto 127/08, que desenvolve o réxime xurídico dos humidais protexidos de Galicia, prohíbe no seu artigo 8:
• (8.a) “a introdución de especies de flora e fauna non autóctonas”

• (8.b) “as actividades que directa ou indirectamente podan producir o desecamento ou a alteración hidrolóxica do humidal”
• (8.c) “as actividades, verteduras sólidas e líquidas de calquera natureza que afecten de forma negativa, directa ou indirectamente á calidade das augas superficiais ou subterráneas, que alimentan e manteñen o funcionamento do humidal”.
• (8.e) “a alteración topográfica da zona periférica de protección do humedal protexido”,
• (8.h) “a utilización de produtos praguicidas, funxicidas ou fitocidas que poidan afectar ao humidal...”
• (8.i) “as infraestruturas, en particular as viarias (...)”,
• (8.l) “calquera actividade deportiva ou recreativa non compatible coas funcións ou valores polos que se declarou espazo protexido”.

O CES lémbralle ao goberno municipal que a potencialidade turística do municipio está baseada na conservación do medio ambiente. Constatamos que a xente que visita O Grove valora enormemente a paisaxe natural da Lanzada.

Consideramos intolerable que se plantexe a posibilidade de empregar patrimonio natural común para montar un negocio privado para unha minoría, máxime cando na mesma provincia xa existe oferta de campos de golf sen que se constate un “despegue” económico nas súas áreas de influencia.

Confiamos no sentido común e o cumplimento da lei, en especial por parte da Consellería de Medio Ambiente, organismo responsable de velar pola conservación deste enclave.

Deste xeito, o CES cre que se debería denegar a instalación desta infraestrutura. De non ser así, a Consellería estaría a incumplir a súa propia lexislación e a de ámbito estatal, motivando as accións legais oportunas ante as organismos pertinentes (incluídos os da Unión Europea).

O CES solicita a medio ambiente o informe sobre a suposta recuperación do Umia e que se replantexe a construcción do paseo fluvial

2008-09-28T23:43:00.001+02:00

Dende o Colectivo Ecoloxista do Salnés acabamos de solicitar unha copia, ou ben a publicación na web, do informe sobre o estado do Umia que a consellería emitiu en abril e no que concluía que a recuperación do río tralo accidente de Brenntag fora moi boa. Xa en xullo solicitaramos dita información e aínda non se nos respostou.

Aínda que valoramos positivamente a rede de seguimento da conca do Umia, na que se fan análises completas en 15 puntos de mostraxe, non comprendemos por que durante o 2007 se fixeron 8 medicións en 6 meses, mentres que no que vai de 2008 só figuran dúas. Tamén observamos que algúns parámetros aínda están en proceso de análise, sendo a última mostra tomada no mes de abril. Por iso solicitamos tamén que se actualicen os datos das análises e se sigan realizando coa mesma frecuencia.

Por outra banda pedimos que se replantexe a construcción do paseo fluvial pactado entre consellería e concellos tras o vertido, xa que este tipo de actuacións destrúen ou impiden a rexeneración do bosque de ribeira, pois fanse sendeiros demasiado pegados á beira do río (non se respecta a franxa de 3 ou 4 m de árbores), con farolas acesas pola noite, que ademais de xerar contaminación lumínica e un gasto enerxético innecesario, alteran os ritmos biolóxicos da flora e fauna fluvial.

Por último solicitamos a información dispoñible no plan de control de vertidos sobre os da zona de Pontearnelas para completar a información recabada nas inspeccións do Proxecto Ríos. Aínda que en principio os datos recollidos nas nosas inspeccións dan valores de nitratos baixos, temos constancia de que os vertidos existen e queremos seguir investigando a súa legalidade, periodicidade e cantidade, pois as nosas inspeccións son ocasionais (2 días ao ano) en nun tramo de tan só 500 m. Polo tanto ditos vertidos poden ser dañinos, aínda que posteriormente os nitratos sexan diluidos ou arrastrados augas abaixo, debido ao gran caudal deste río no tramo baixo. Ademais en ditos vertidos poden existir outras substancias perxudiciais para cuias análises non temos medios.

O Salnés, a 26 de setembro de 2008.

Paralizado o recheo da lagoa Fianteira

2008-07-07T20:52:00.002+02:00

Segundo informa o Diario de Arousa o mércores, 2 de xullo, a Xerencia de Urbanismo do Concello de Sanxenxo paralizou o recheo da lagoa de Fianteira, na parroquia de Vilalonga.

Seguiremos informando.
Infórmate na hemeroteca do Diario de Arousa

O CES esixe a paralización inmediata dos recheos que Cerámica Campo está levando a cabo na lagoa da Fianteira.

2008-07-01T18:40:00.005+02:00

Nos últimos días a empresa Cerámica Campo está facendo recheos de terra a gran velocidade na lagoa da Fianteira, pola súa zona central.

Dende o CES, de novo con indignación, esiximos á consellería de Medio Ambiente que nos informe de se teñen autorización para facelo. Aínda que así fora, esiximos explicacións e a paralización inmediata de dita actividade por ser totalmente incompatible coa conservación da lagoa.

Dita lagoa, ademais de estar dentro da zona de protección da Rede Natura e do Humidal Protexido Umia- O Grove, ten unha gran importancia ecolóxica, pois entre outras desempeña as funcións de servir de refuxio para uns 500 ánades reais que mudan nela a súa plumaxe, e lugar de durmida durante o inverno doutras 500 cercetas, así como garzas, garcetas e porróns que pasan o día na zona de Dena. Ademais trátase do único lugar de cría de Martiño Peixeiro no Salnés. Ao lugar tamén acuden a alimentarse bandadas de anduriñas e os avións que crían na zona de Portonovo. Todo isto en canto á avifauna, pero é que ademais está constatada a presenza de varias especies de anfibios e peixes (entre eles, indicios da especie protexida Gasterosteus aculeatus ou espiñento), así como mamíferos que van en busca de alimento como morcegos, coellos, raposos e a cada vez máis escasa lontra.

As agresións que Cerámica Campo está a efectuar no lugar son continuas e remóntanse a varios anos atrás, cando xa se comenzara un recheo parcial que logo se detivo. Máis recentemente, no verán do 2007 realizouse unha tala de salgueiros dunha grande extensión nas inmediacións da mesma sen a autorización pertinente de Medio Ambiente, co obxectivo de continuar coa extracción de arxilas na zona. No seu momento, o CES preguntou á Consellería se a empresa contaba coa autorización necesaria para seguir extraendo arxilas, sen acadar resposta ata o de agora.

Preguntámonos por que a consellería é tan permisiva con esta industria, e de que serve protexer un espazo dobremente (a nivel galego e europeo) se logo se permite a súa destrucción sen máis. Neste sentido queremos recordar que hai quince anos que debería estar aprobado o P.O.R.N. (Plan de Ordenación dos Recursos Naturais) deste espazo, ferramenta imprescindible para delimitar en que lugares a extracción de arxilas sería compatible coa conservación e en cales non.

En calquera caso, o réxime xurídico dos humidais protexidos de Galicia, prohíbe as actividades que poidan producir o desecamento ou a alteración hidrolóxica do humidal, así como as verteduras sólidas e líquidas de calquera natureza que afecten de forma negativa á calidade das augas, e tamén as modificacións da cubeta e das características morfolóxicas do humidal, o recheo do humidal con calquera tipo de material, así como a alteración topográfica da súa zona periférica de protección.

Resulta evidente que un recheo, do que descoñecemos que dimensións terá, atravesando a lagoa producirá un ou varios deste tipo de impactos. Só esperemos que, facendo cumprir a lei, se paralice a tempo para non ter que comprobalo cando sexa demasiado tarde.

Travesía polos mares de Sálvora

2008-06-17T22:13:00.006+02:00

Actividade mensual aberta de Xuño. Excursión anual.

“Travesía polos mares de Sálvora”

O domingo 29 de xuño terás a oportunidade de coñecer, por terra e por mar, un dos 4 arquipélagos que compoñen o Parque Nacional Marítimo Terrestre das Illas Atlánticas de Galicia. Realizaremos unha visita a pé pola illa que flanquea a Ría de Arousa e percorreremos en catamarán os illotes que a acompañan.

O barco (Neptuno Sub) sairá ás 9.45 do porto de catamaráns do Grove (ao lado da estación de autobuses) e regresará ás 17.45

Poderás compralos nos seguintes puntos:
◦ No Grove
Quiosco Antía (Praza de Arriba)
◦ En Portonovo
Quiosco de Mandita
◦ En Cambados
Casa de Cultura de Fefiñáns
◦ En Vilagarcía
Librería Nobel Arousa (Rúa Edelmiro Trillo, 19)
◦ Por teléfono
Chama ao 680 580 086

Recomendámosche levar:
A comida e a bebida porque pararemos para facer unha comida campestre.
Roupa e calzado axeitados para camiñar, e para darte un chapuzón se se presta.
Crema solar.
Tamén é útil levar prismáticos.

Recorda que non é necesario ser socio para asistir ás actividades do CES. Por iso, se coñeces a algunha persoa allea ao Colectivo que puidera estar interesada, non deixes de invitala a vir.

O Colectivo Ecoloxista do Salnés propón melloras ao Plan do Revel (Vilalonga, Sanxenxo)

2008-05-29T15:22:00.002+02:00

O Colectivo Ecoloxista do Salnés ven de entregar no Concello as alegacións correspondentes ao Informe de Sostibilidade Ambiental (ISA) relativo ao Plan Especial de Infraestruturas e Dotacións de O Revel, en Vilalonga. Este Plan contempla a construción de equipamentos públicos (gardería, centro para maiores, campo de fútbol, etc), sendo promovido polo Concello de Sanxenxo.

O fundamento dos ISA é minimizar o impacto sobre o medio, avaliando diversas posibilidades.

Sen cuestionar a necesidade de ditas infraestruturas, criticamos duramente os seguintes aspectos relacionados coas obras:

1) Que o concello retrasase durante un ano a redacción e exposición pública do I.S.A. Así, a obra xa está hoxe a medio facer sen ter en conta os criterios de protección ambiental, incumprindo a lexislación europea. A escusa plantexada polo concello, a suposta urxencia destas dotacións, parécenos insultante, xa que fronte ao centro de saúde e unha gardería proxectados na zona, déuselle prioridade a un campo de fútbol, xa construído (e inaugurado na pasada campaña electoral).

2) Que o ISA carece de rigor técnico, xa que non segue a estrutura establecida pola Consellería de Medio Ambiente nin se elaboraron correctamente tódolos apartados indicados nel. Isto denota desinterese dos promotores en buscar unha repercusión menos negativa sobre o medio.

3) Ao describir os efectos sobre o ambiente e buscar medidas correctoras, non se tiveron en conta criterios básicos como:

-Respectar o cauce do regato do Revel e o seu bosque de ribeira. Preténdese canalizar o regato nas tres cuartas partes do seu percorrido polo polígono. Isto produce perda de biodiversidade, destrución da paisaxe e aumenta o risco de inundacións, aspectos todos eles que se ignoran no informe presentado polo concello, que mesmo chega a afirmar que “no hay espacios naturales de calidad en el ámbito ordenado”.

-Non fomenta o uso de medios de transporte menos contaminantes. O Plan contempla, ao noso parecer, un exceso de estradas e aparcadoiros que promove o uso do vehículo privado, tratándose dunha zona pequena que rapidamente se percorre andando. É contraditorio que no informe se xustifique a non construción de carril bici debido á pequena dimensión da zona e ao tempo se proxecte a construción de catro estradas de dous carrís.

Por todos estes motivos consideramos que para que o ISA cumpra a súa finalidade e non se quede en papel mollado débense incluír as seguintes modificacións do proxecto:

1- Non executar a canalización do regato nin a destrución do bosque de ribeira asociado.

2- Non construír unha vía para vehículos particulares tan extenso nin con tantos aparcamentos. Consideramos que co vial central, xa construído, e co que da acceso directo á gardería sería suficiente. O CES propón que os outros dous viales plantexados sexan substituídos por un paseo peonil paralelo ao regato, cun posible carril bici.

Con estas medidas a zona proporcionaría unha maior calidade de vida aos cidadáns sen comprometer o acceso en coche a ningún dos equipamentos.

Así mesmo, o CES solicitou á Consellería de Medio Ambiente que tome tódalas medidas necesarias para que esta situación non se volva a repetir e as administracións locais non burlen o cumprimento da lexislación ambiental europea.

O Colectivo Ecoloxista do Salnés outorga un suspenso aos informes de sostibilidade ambiental (I.S.A.) dos SU-13 e SU-14 en Monte Faro, Sanxenxo

2008-05-11T13:03:00.001+02:00

O CES vén de presentar alegacións a ambos ISA, nos que detectou diversos fallos, tanto na estrutura do documento como na valoración dos seus efectos sobre o medio ambiente.

Unha obriga legal. Como consecuencia da transposición das Directivas da UE á lexislación estatal e autonómica(1), establécese que ditos plans parciais (SU-13 e SU-14) deben pasar o trámite da Avaliación Ambiental Estratéxica, ao non pasalo o PXOM (anterior a esta norma). O proceso esixe que os promotores do plan parcial presenten un I.S.A. onde se avalíen os efectos do mesmo en base a unha serie de criterios (efectos no solo e augas, enerxía, emisións contaminantes, xestión de residuos, actividades económicas, integración social, medio natural, paisaxe, medio urbanizado, patrimonio, vivenda e mobilidade). Dito informe debe pasar o visto bo da Consellería de Medio Ambiente para que os plans parciais sexan aprobados definitivamente.

O derradeiro enclave forestal do municipio. Estes plans parciais prevén a urbanización e construción de vivendas nun monte ata o de agora intacto e que supón unha das escasas masas forestais do concello. Isto supón un impacto moi negativo e irreversible, tanto na ocupación do solo como a nivel paisaxístico. Unha xestión forestal sostible da zona permitiría diversificar a economía do concello (hoxe demasiado dependente dun só modelo de turismo), e manter e mellorar o seu atractivo paisaxístico.

Urxe revisar o PXOM. Para evitar tal desfeita deberíase facer unha revisión e modificación do PXOM, tal e como solicitamos nas alegacións presentadas, e reclasificar ambos sectores a solo rústico de protección forestal. Dita revisión ou modificación é legalmente posible(2), no caso de que non se cumpran as circunstancias e previsións iniciais en canto a crecemento demográfico e demanda de vivenda. O CES nunca estivo de acordo con ditas previsións, que xa dende o momento da tramitación do PXOM (ano 2003) consideramos esaxeradas e fóra da realidade, motivo polo cal presentaramos alegacións a todo o PXOM, e entre elas, á realización destes proxectos nos SU-13 e SU-14. Porén, ditas alegacións non foron tidas en conta, e inexplicablemente, a Consellería de Política Territorial deu o visto bo a un PXOM que contradicía os propios principios da Lei 9/2002: “garantir o uso sostible do territorio e preservar o patrimonio natural, así como favorecer o acceso da poboación á vivenda”. Lonxe disto, o PXOM de Sanxenxo permite realizar aberracións paisaxísticas como as que nos ocupan, ou as aprobadas e en execución no caso da Granxa e Festiñanzo: o CES tamén alegara no seu día contra estes proxectos, que seguiron adiante.

Un municipio urbanizado dabondo. A oferta de vivenda neste concello supera amplamente á demanda, sendo inxustificable un proxecto no que grande parte das vivendas serán adicadas a segunda residencia (como se recolle no propio documento). Esta teima do goberno local en orientar o municipio cara á construción de segundas residencias está na base de problemas socioeconómicos, ao teren que marchar moitos mozos a outros municipios para poderen acceder a unha vivenda.

Un modelo turístico caduco. O CES alega tamén, por insostible, contra a pretensión dun campo de golf de 65 Ha no SU-13: 8 horas diarias de rego (cos efectos consecuentes nos pozos e agricultura da zona), emprego abusivo de pesticidas, perda de diversidade biolóxica e paisaxística... Buscando no golf unha chave para desestacionalizar o turismo, argumento base de sonoros fracasos (Meis - Castrove, Domaio...) e hipotecando un dos principais recursos turísticos da comarca: a súa paisaxe e valores naturais (pois así o reflicten os inquéritos realizados entre os turistas que nos visitan).
A desestacionalización do turismo pasa por preservar e poñer en valor os nosos importantes valores naturais, atraendo ao mercado do turismo ecolóxico.

Dende o CES reclamamos:

- A aceptación das alegacións presentadas.

- A aceptación das alegacións presentadas.

- A revisión do PXOM de Sanxenxo.

- A protección do Monte Faro fronte á urbanización, orientando esta zona cara actividades forestais sostibles que integren as súas funcións económicas e paisaxísticas.

- O desenvolvemento de modelos turísticos sustentables, baseados na enorme riqueza ambiental e patrimonial da comarca, fuxindo de crear artificiais e vulgares copias doutros lugares.

- Maior valentía e implicación, por parte da administración autonómica, na redacción e aplicación das leis sobre territorio, ambiente e paisaxe.

Notas
(1): Lei 9/2006, sobre efectos de determinados plans e programas sobre o medio ambiente.
Lei 6/2007 de medidas urxentes en ordenación do territorio e do litoral
(2): Lei 9/2002 de ordenación urbanística e protección do medio rural de Galicia.

O Umia en primavera: a actividade de maio

2008-05-08T21:32:00.002+02:00

Actividade aberta de maio
O CES ORGANIZA UNHA XORNADA DE INVESTIGACIÓN DO RÍO UMIA

O Colectivo Ecoloxista do Salnés organiza a actividade aberta mensual correspondente a este mes: O UMIA NA PRIMAVERA. María Sánchez, educadora ambiental y Raquel González, bióloga e ambas socias do CES, guiarán a actividade, mostrándonos dun xeito práctico a metodoloxía que se segue e os obxectivos que se perseguen dentro do programa PROXECTO RÍOS. O Proxecto Ríos é unha iniciativa de concienciación, educación e participación cidadá en defensa dos nosos ríos. Fundaméntase na realización de inspeccións do estado dos ríos galegos por parte de persoas ou grupos voluntarios a nivel local, co obxectivo final de facerse responsables da vixilancia (adopción) do río que pasa polo seu municipio ou localidade.

A actividade realizarase o sábado 10 de maio ás 10 da mañá na ponte vella de Ponte Arnelas (entre Vilanova e Ribadumia) para, dende alí, dirixirnos a unha zona próxima. Inspeccionaremos un tramo duns 500 m do río Umia. Terá unha duración aproximada de dúas horas.

Esta actividade, que xa realizamos en outubro do ano pasado, ten afán de continuar no tempo para poder levar a cabo unha comparativa dos datos e avaliar o estado do río ao paso pola nosa comarca. Así, ao igual que no 2007, comprobaremos a canle, a auga, a flora e a fauna para ir recollendo datos do estado ambiental do río Umia.

É recomendable levar unhas botas de goma para andar pola auga.

Esta actividade é aberta a todos os públicos e é de balde.

Manifestación en Pontevedra

2008-04-25T19:44:00.003+02:00

O próximo venres 25 de ABRIL, ÁS 8:30 na PLAZA DA FERREIRÍA, EN PONTEVEDRA

MANIFESTACIÓN POLA NON CONSOLIDACIÓN DO COMPLEXO ENCE-ELNOSA NA RÍA.

O CES está a apoiar a última campaña da Asociación pola Defensa da Ría de Pontevedra co motivo da NON AUTORIZACIÓN AMBIENTAL PARA ENCE-ELNOSA, por parte da Consellería de Medio Ambiente. Esta autorización podería servirlle á empresa para consolidarse na ría.
O CES estará presente e con pancarta, así que o punto de quedada dos socios na plaza será fronte o BAR CARABELA.

A balanza da situación ambiental o Día da Terra

2008-04-21T23:56:00.002+02:00

O día 22 de abril, Día da Terra, data sinalada para o movemento ecoloxista mundial, danos a oportunidade para a reflexión e a analítica da situación ambiental da nosa sociedade. Dende ese punto de vista e concretando na nosa comarca, o Colectivo Ecoloxista do Salnés (CES) quere aportar unhas ideas para a reflexión e un balance ambiental da comarca.

No lado negativo da balanza ambiental no Salnés, non cabe dúbida que o que mais pesa é o desbordamento urbanístico que estamos a sufrir, que só enriquece a uns poucos. Sen embargo, a perda repártese entre todos, pois a paisaxe, como ben común, perde calidade e fermosura.
Esta mala planificación do territorio compleméntase coa mala xestión ambiental das nosas administracións locais. Algúns exemplos desta ineficacia son os entullos que se amorean polos nosos montes, a mal uso da auga e a súa case ineficaz depuración, actuacións equivocadas nos nosos ríos e regatos que os desnaturaliza, a inexistencia de campañas de información e concienciación ambiental á cidadanía,...

O lado positivo da balanza está a coller certo peso, pois algunhas boas noticias están a suceder, como é o caso da posta en marcha da segunda fase de recuperación das dunas da Lanzada, levada a cabo polo Servizo Provincial de Costas. Nel contémplase o derrube dalgunhas infraestruturas que afean unha das nosas mellores paisaxes, levantarase o firme da antiga estrada costeira, soterrarase a liña eléctrica, ampliarase o paseo de madeira e aportarase información ao cidadá sobre o valor das dunas. Non cabe dúbida que a realización desta rexeneración ambiental é algo moi positivo, que ven a complementar a primeira fase feita no ano 1996 que incluía a demolición da carreteira situada no cordón dunar. Daquela se levantaron moitas voces críticas que ao igual que na polémica do campionato do tiro ao pombiño da Toxa, que finalmente non se realizará, auguraban graves perdas no sector turístico. O tempo pon as cousas no seu sitio e outorga a razón ao sentido común e ao bo facer.

Este ano o Día da Terra céntrase na loita polo cambio climático. Neste senso é importante que adiramos á “Cultura da Medida”, onde debemos cuantificar os nosos gastos eléctricos e de combustibles e traducilos en emisións de dióxido de carbono. Así decatarémonos do importante papel que xogamos cada un de nos no actual desequilibro do clima. Neste ámbito é preciso que as administracións fagan campañas á cidadanía, aportando as claves para reducir o gasto enerxético doméstico á vez que fomente economicamente aquelas técnicas de construción e aparellos que axuden a aforrar enerxía. É preciso decatarnos que o cambio climático pódese parar pero so co apoio de todos.

Cortegada sen mancha

2008-03-06T15:43:00.002+01:00

Xornada de recollida de lixo na Illa.
Se queres axudar a que Cortegadaluza mellor cara, apúntate a recoller lixoo sábado8 de marzo nesta illa protexida. Para participar debes apuntarte no teléfono do Colectivo Ecoloxista do Salnés: 680 580 086
¡Anímate!
Colabora o Parque Nacional Marítimo Terrestre das Illas Atlánticas de Galicia

Ollando aves o sábado 26 de xaneiro

2008-01-24T07:56:00.000+01:00

Observación das aves do Serrido e O Correlo.
O sábado 26 acudiremos a Castrelo (Cambados) para ollar as aves da Enseada do Bao e o Esteiro do Umia. Quedamos nas Adegas Salnesur (Condes de Albarei) na desviación fronte o colexio dos Salesianos, para ir paseando ao observatorio ornitolóxico de Quintáns-Punta Arfolín. Haberá guías de aves e máis telescopios e prismáticos.
Leva calzado axeitado para o campo.
Se tes prismáticos levaos tamén. ¡Participa!

Lembra:
quedamos o sábado 26 ás 10:30 da mañá nas Adegas Salnesur en Castrelo-Cambados, na desviación frente o colexio Salesianos.
Actividade gratuíta e aberta ao público

Actividade de novembro: O segredo das rochas

2007-11-16T19:16:00.000+01:00

O sábado 24 tentaremos imaxinar como foi a evolución da paisaxe ao longo de millóns de anos ata adquirir a forma actual e como seguirá este proceso no futuro. Observaremos as praias, os cantís e as dunas fósiles que son a testemuña das variacións do nivel do mar por períodos glaciares ou interglaciares…

¡Participa!
É recomendable levar botas de montaña.
Lembra:

quedamos o sábado 24 ás 10:30 da mañá no aparcamento da praia de Montalvo e, desde alí iniciaremos o paseo.

Actualización:

Unhas vinte persoas participaron nesta interesante actividade. Puidemos apreciar un anticlinal e máis unha praia fósil.

Actividade de outubro: Apadriña o Umia

2007-11-01T20:41:00.000+01:00

O Proxecto Ríos baséase nas inspeccións dos ríos galegos por parte de voluntarios dúas veces ao ano.
Participamos neste proxecto coa actividade aberta do mes de outubro. Quedamos o pasado sábado 27 de outubro ás 10 da mañá na ponte vella de Ponte Arnelas, entre Vilanova e Ribadumia, para, dende alí, dirixirnos a unha zona próxima.

Inspeccionamos un tramo duns 500 m do río Umia durante un par de horas.
Comprobamos a canle, a auga, a flora e a fauna.

Estas son as fotos do día:

Cultiva os teus cogumelos

2007-10-22T12:27:00.000+02:00

O sábado 29 de setembro, o Colectivo Ecoloxista do Salnés organiza un obradoiro sobre o cultivo doméstico dos cogomelos Pleurotus, na Aula de Natureza da Siradella (O Grove), ás 19:30 horas.
Non faltes!

Xornadas de DEREITO AMBIENTAL: unha ferramenta para a protección do medio

2007-09-22T22:36:00.000+02:00

29 de Setembro e 6 de Outubro de 2007
LUGAR: Pazo da Cultura de Pontevedra

As xornadas pretenden servir de base ao ecoloxista activo e ao cidadán concienciado sobre a necesidade que temos de coñecer a diferente normativa que está á nosa disposición e que moitas veces descoñecemos.
Que facer? Que ferramentas xurídicas utilizar? A que autoridades recurro? A cuestións como estas intentarase dar resposta dividindo en varias áreas competenciais as xornadas, abordando dende a normativa comunitaria á municipal, pasando polas competencias estatais e autonómicas, que se complementan con experiencias prácticas.

Esta actividade conta cunha axuda da Consellería de Medio Ambiente, Xunta de Galicia
Organiza: Federación Ecoloxista Galega , ADENCO, APDR
Colabora: Colexio Oficial de Biólogos

Programa

Sábado 29 de Setembro
09:45h.- Recepción dos participantes e entrega de documentación.
10:00h.- Participación pública nos procesos de avaliación ambiental.
Que actuacións teñen que seguir un proceso de avaliación ambiental? Que pasos ten que seguir ese proceso? En que partes do proceso podemos intervir os colectivos ecoloxistas?
Relatora: Alba Nogueira, Prof. Titular de Dereito Administrativo na Facultade de Dereito de Santiago.
12:00h.- A denuncia ambiental. O delicto ambiental. Tipos de denuncia, cando interesa recurrir á xustiza, o procedemento, onde participar...
Relator: Álvaro García Ortiz, Fiscal para o Medio Ambiente de Galicia.
14:00h.- Remate das sesións da mañá.

16:30h.- Protección dos espazos que carecen de figuras de proteción
(toda a lexislación (desde a europea atéa galega) precisa para coñecer que requisitos ten que cumprir unha determinada actuación (no caso de
que se leve a cabo) que poida afectar a un espazo que non conte cunha figura de protección específica.
Relator: Manuel Antonio Crespo Pérez, Prof. Asociado de Dereito Administrativo da Universidade de Vigo.

Sábado 6 de Outubro
10:00h.- Espazos Naturais Protexidos: toda a lexislación (desde a europea até a galega) precisa para coñecer que requisitos ten que cumprir unha determinada actuación (no caso de que se leve a cabo) que poida afectar a un espazo protexido (LIC, ZEPA, Ramsar...).
Relator: Francisco Javier Sanz Larruga, Prof. Titular da Universidade da Coruña.
12:00h.- Como redactar unha alegación para que teña incidencia ou sexa efectiva? O dereito á información ambiental. A modo de taller práctico.
Relator: Jaime Doreste, Asesor Xurídico de Ecologistas en Acción.
14:00h.- Remate das sesións de mañá.

16:30h.- Taller práctico sobre procedemento administrativo en relación á normativa ambiental dirixidoao activista ecoloxista e ao cidadán concienciado.
Relator: Roberto Bustillo, Prof. Titular de Dereito Administrativo da Facultade de Dereito de Ourense, Univ. de Vigo.
18:00h.- Remate das xornadas.

Prezo da inscrición:
10 euros: socios/as de asociacións da FEG ou socios/as colaboradores/as da FEG.
20 euros: outras persoas.
A ingresar na conta da FEG (Caixa Nova): 2080-0492-69-0040104336

Para facer efectiva a inscrición, enviar á FEG o boletín cuberto xunto cunha copia do xustificante de ingreso bancario. Para o cal se
pode empregar algunha das seguintes vías:
Por Fax: 981 575 444
Por correo electrónico: feg@federacionecoloxista.org
Por correo postal: FEG Aptdo. de Correos 949, 15780, Santiago de Compostela.

Aberto un expediente sancionaor ao campionato de tiro ao pombiño

2007-09-11T23:00:00.000+02:00

O CES VALORA POSITIVA A APERTURA POR PARTE DA CONSELLERÍA DE MEDIO AMBIENTE DO EXPEDIENTE SANCIONADOR AO HOTEL HESPERIA, ORGANIZADOR DO CAMPIONATO DE TIRO AO POMBIÑO DESTE ANO.

Perdigóns de chumbo caídos ás rochas do Humidal Protexido Umia-O Grove

O Colectivo Ecoloxista do Salnés alertou á Consellaría de Medio Ambiente xa no mes de xullo, a través dun escrito, da caída de perdigóns de chumbo no humidal protexido Umia – O Grove, provinte do campionato de tiro ao pombiño celebrado en A Toxa do 6 ao 15 dese mes. Neste escrito denunciábase a ineficacia das medidas de protección ambiental aplicadas pola organización;: o Hotel Hesperia e a Federación de Tiro al Vuelo.

Para autorizar este certame, a Consellaría estableceu este ano dúas condicións: o emprego de munición sen chumbo, e a colocación de pantallas de protección efectivas, xa que por lei non se pode disparar con chumbo en humidais protexidos.

Ningunha destas condicións foi cumprida, polo que o CES ve moi positiva a resposta da Consellaría de Medio Ambiente, abríndolle expediente sancionador á organización. En especial, o CES quere recordar que esta situación non é nova, pois a organización deste campionato leva anos incumprindo a lexislación e ignorando as notificacións ao respecto de diversos departamentos públicos. Este incumprimento é por si xa un motivo suficiente para denegar o permiso para este campionato no futuro.

Ante a máxima europea de que “quen contamina, paga e restaura”, o CES reclama que se lle obrigue aos organización deste certame a sufragar os custes de descontaminación do contorno.

"Unha barbaridade con pichón"

2007-07-22T22:51:00.000+02:00

Unha carta ao director.
20 de xullo de 2007
La Voz de Galicia Edición Arousa. páxina Local-11

MANIFESTO: ALTO Á BARBARIE DO TIRO AO POMBIÑO

2007-07-17T15:24:00.000+02:00

MANIFESTO

ALTO Á BARBARIE DO TIRO AO POMBIÑO
Sábado 14 de xullo de 2007, O Grove

Bos días, amigos e amigas, e grazas por apoiar este acto de protesta. En especial, agradecemos a colaboración das seguintes entidades que apoiaron a campaña: Federación Ecoloxista Galega, ADEGA, AMIGOS DA TERRA,APDR, COTO DO FRADE, MATARPORMATAR NON, LUITA VERDE, RIDIMOAS, SGEA, SGHN-Pontevedra, VERDEGAIA, VAIPOLORÍO, APADAN, Asoc protectora ABEIRO, Asoc. COMETA, Asoc. GATOCÁN, Asoc. OS PALLEIROS, Asoc.Protectora de Cans e Gatos de OURENSE, Asoc. Protectora de Animais VERDUXO, Asoc. protectora de animais SEN FRONTEIRAS, Unión de Protectoras de Animais Federadas de Galicia e as Asoc. protectoras de animais de: BAIONA, BARBANZA, CAMBADOS, LUGO, MARÍN E VIGO.

A moi poucos metros de aquí estase a celebrar un campionato de tiro “al vuelo”, eufemismo baixo o que se agocha mutilar e masacrar a tiros a milleiros de crías de aves indefensas para satisfacción duns mal chamados “deportistas”. Estas aves percorreron centos de quilómetros por estrada, e logo de sérenlle recortadas as plumas da cola para que non podan dirixir o seu voo, sóltanse xusto diante do tirador. E a isto chámanlle deporte?

Esta práctica cruel e aberrante supón, ademais, a contaminación durante décadas da nosa ría con quilos e quilos de perdigóns de chumbo, que envelena aos nosos mariscos e aves nun espazo natural de incalculable valor, protexido internacionalmente. Para isto, sáltanse constantemente a lei mediante artificios, contando coa complicidade dunha administración covarde en materia ambiental.

Argumentan os organizadores que o campionato é bo para o turismo, que deixa cartos na vila e que lle dá renome á Toxa. Vese que non valoran á comarca na súa medida, que non aprezan a súa beleza e valores. Acaso non ten recursos A Toxa para atraer a un turismo máis san? E se fose así, que levan feito ata o de agora xestores privados e públicos por buscar novas vías de atracción a unha comarca chea de posibilidades sen explotar? Que non se escuden no movemento de cartos: o furtivismo, o tráfico de armas, de drogas e de especies protexidas tamén moven enormes cantidades de cartos, mais non deixan de ser inmorais, e ilegais na maior parte dos países civilizados.
Os organizadores, e certos sectores locais, rozan o ridículo cando falan de que este campionato axuda a “desestacionalizar” o turismo... En pleno mes de xullo? Se xullo é temporada baixa... cando é alta?

Reclamamos que este ano sexa a última vez que se celebre este vergoñento certame. Por cruel, por indigno, por ilegal, por inmoral, por contaminante, por denigrar a imaxe da comarca e por afectar ás aves migratorias. Existen alternativas aos perdigóns de chumbo, e en lugar de pombiños mutilados pódense empregar pratos ou hélices.
Pedímoslle á Consellería de Medio Ambiente que non volva dar unha soa autorización máis para campionatos de tiro ao pombiño, e que deixe de escudarse nunha lei de protección dos animais que a todas luces xa está anticuada. Na man da administración está cambiala e mellorala. Por que se tarda tanto? E que nos escoiten entre o ruído dos tiros: alto á barbarie do tiro ao pombiño, Xa!

máis fotografías da concentración do tiro ao pombiño

2007-07-17T14:59:00.000+02:00

Algunhas fotos máis da concentración do sábado 14 de xullo para conseguir a prohibición e sanción da actividade do tiro ao pombiño.

ASÍ FOI A CONCENTRACIÓN DO TIRO AO POMBIÑO

2007-07-17T14:29:00.000+02:00

Vaia plan para un sábado, sabadete! Pensar que en pleno século XXI aínda teñamos que saír á rúa a protestar por que segue habendo xente que se divirte matando dun xeito tan covarde?.

Mais alí estabamos unhas 80 persoas vidas non só da comarca, senón que tamén recibimos apoios de asociacións de toda Galicia, as que dende o CES non nos cansamos de darlles as GRACIAS!!!! polo seu apoio á campaña e polo esforzo de achegarse ao Grove dende Vigo, Ourense, Santiago, Carballiño, Pontevedra …

A concentración tivo moita repercusión na prensa local, saíndo na portada da edición de Arousa da Voz, do Faro e de Diario de Arousa.

Aquí tendes algunhas fotos do día, que intentamos fora alomenos divertido, dentro da seriedade da protesta.

Pombiños: pío, pío. Escopeteiros: pum, pum.

2007-07-15T15:56:00.000+02:00

Un avance da crónica do sábado:

Novos grupos ecoloxistas apoian a campaña contra o tiro ao pombiño (+1)

2007-07-12T22:05:00.000+02:00

Actualizamos a lista:
FEG, ADEGA, AMIGOS DA TERRA, APDR, COTO DO FRADE, "MATAR POR MATAR NON", LUITA VERDE, RIDIMOAS, Sociedade Galega de Historia Natural-Pontevedra, VERDEGAIA, VAIPOLORÍO, APADAN, Asociación protectora ABEIRO, Asociación COMETA, Asociación GATOCÁN, Asociación OS PALLEIROS, Asociación. Protectora de Cans e Gatos de OURENSE, Asociación protectora de animais SEN FRONTEIRAS, Asociación VERDUXO, UPAFGA e as Asociacións protectoras de animais de: BAIONA, BARBANZA, CAMBADOS, LUGO, MARÍN e VIGO.

NOVA ACTUALIZACIÓN (13 xullo): Tamén apoia a campaña a SGEA (Sociedade Galega de Educación Ambiental

Lembra: O sábado 14 ás 12 no paseo de beiramar (ver a noticia anterior para o programa detallado)

E para apoiar a campaña envía esta imaxe aos correos indicados na noticia anterior:

mvazquezf@xunta.es
dxcn@xunta.es
sxma@xunta.es

Reenvía e difunde esta postal entre os teus coñecidos.

Para evitar as longas cadeas de enderezos electrónicos que facilitan
o correo-lixo (spam), coloca os enderezos de envío na liña de
dirección oculta (Cco ou Bcc) en lugar de Para (ou To). Deste xeito
cada un dos teus coñecidos recibirá a mensaxe sen acumular as outras
direccións.

Envía esta POSTAL ELECTRÓNICA… e ven o sábado 14 á CONCENTRACIÓN no Grove

2007-07-09T01:24:00.000+02:00

Se estás contra o sufrimento e o maltrato innecesario aos animais…
se estás contra a agresión ao medio que representan os perdigóns de
chumbo na Enseada do Bao, na Illa da Toxa…

ENVÍA ESTA POSTAL ELECTRÓNICA á Consellería de Medio Ambiente para deter o tiro ao pombiño:

CONCENTRACIÓN no Paseo de Beiramar do Grove diante da Ponte da Toxa
SÁBADO 14 de XULLO ás 12 horas
1. Parodia do tiro ao pombiño
2. Lectura dun manifesto
3. Andaina ata as inmediacións do Campo de Tiro, co afán de que nos escoiten, non de sabotearlles o campionato
4. O Colectivo Ecoloxista convidará a empanada no parque público central da Illa da Toxa

COLECTIVO ECOLOXISTA DO SALNÉS
Apoian: Federación Ecoloxista Galega, ADEGA, VERDEGAIA, LUITA VERDE, VAIPOLORÍO, APDR, APADAN, Asociación GATOCÁN, Asociación de Acollida de Cans OS PALLEIROS, Asociación. de Protección de Animais ABEIRO, Asociación Protectora de Animais SEN FRONTEIRAS, SGHN-Pontevedra, "MATARPORMATAR NON" e COTO DO FRADE.

Os organizadores do campionato do tiro ao pombiño están a incumplir as condicións de autorización do evento

2007-07-09T01:20:00.000+02:00

Este ano, tras unha ampla polémica social, a Consellería de Medio Ambiente e a Subdelegación de Goberno deu a autorización á Federación de tiro ao vuelo e aos promotores hosteleiros de A Toxa (Hotel Hesperia) para a celebración do “Campeonato de Tiro al pichón” nos días 6 ao 15 de xullo.

Máis esta autorización comprometía aos organizadores a cumplir uns requisitos que a Consellería de Medio ambiente impuxo:
- a substitución da munición de chumbo por outra (de porcelana ou de aceiro),
- instalación de pantallas protectoras eficaces, para evitar a caída de perdigóns ao intermareal do Humedal Protexido Umia- O Grove, onde non se pode empregar a caza con perdigóns de chumbo..

Nembargantes os promotores a día 2 de xullo de 2007, mediante unha nota de prensa manifestaron que non empregarán munición de chumbo e que o único que farán é presentar a nova munición “ecolóxica”.

Por isto o CES considera que estan incumplindo, denantes mesmo de empezar co campionato, as condicións da autorización provisional que lles concederon as administracións competentes, poñendo así en evidencia, un ano máis, o pouco respecto que a “Federación de Tiro al vuelo” e os coorganizadores teñen polas leis e a autoridade administrativa.

Así, o CES solicitará mediante un escrito á Consellería de Medio Ambiente, que lle retire a autorización concedida por incumplimento das condicións. No caso de que o campionato se faga igualmente solicitamos que se lles sometan a vixiancia exhaustiva no que respecta á caída de perdigóns de chumbo ao humedal protexido e se proceda á emitir as sancións convintes e á reparación ambiental do entorno.

Cincuenta persoas acudiron a excursion anual a Serra do Suido

2007-06-27T14:36:00.000+02:00

24 xuño, excursión anual do Colectivo: o Reino do Lobo

2007-06-14T15:22:00.000+02:00

Á SERRA DO SUÍDO CO COLECTIVO ECOLOXISTA DO SALNÉS

A Serra do Suído sitúase entre os concellos da Lama, Fornelos de Montes e Covelo, na provincia de Pontevedra, e Avión e Beariz, na de Ourense. Un espazo de alto interese tanto natural (co lobo como valor emblemático) como etnográfico (a paisaxe do pastoreo tradicional).
Domingo 24 de xuño
Saímos ás:
8:30 VILAGARCÍA (dende o Auditorio, fronte aos cines e McDonald’s)
9:00 CAMBADOS (Praza de Abastos)
9:30 PORTONOVO (marquesina de bus da Praza de Abastos)

Lembra levar a comida, roupa e calzado adecuados para andar polo monte.

Podes comprar os billetes en:
O GROVE
Estanco nº 3 (R/Alexandre Bóveda, fronte ó Bar Giso)
Quiosco Antía (Praza de Arriba)
PORTONOVO
Quiosco de Mandita
CAMBADOS
Casa de Cultura de Fefiñáns
VILAGARCÍA
Librería Nobel Arousa (Edelmiro Trillo, 19)

O Dia do Medio Ambiente invita á reflexión sobre o medio de vida

2007-06-05T13:35:00.000+02:00

5 de xuño: Día de Medio Ambiente, data que dende o Colectivo Ecoloxista do Salnés consideramos un día de reflexión sobre o modelo de progreso que a sociedade quere para si mesma.
Quizais, tras unhas eleccións municipais, se debería adicar este día a facer balance da xestión medioambiental dos nosos concellos, e da comarca do Salnés.
Dende o Colectivo Ecoloxista do Salnés queremos facer unha invitación ás novas corporacións dos concellos da nosa comarca a sacar adiante políticas de verdadeiro Desenvolvemento, é dicir, do Sostible.
Realmente queda moito por facer a nivel ambiental. Facendo unha pequena análise da situación, o CES cree que na nosa comarca hai algúns aspectos ambientais que precisan dun impulso técnico e político maior:
• Deseñar parques empresariais onde as medidas de control de contaminación de augas e ar e ruídos queden minimizadas. Os ata agora construídos non o fan.
• Crear e impulsar liñas de transporte colectivo entre as vilas da comarca do Salnés, con alta frecuencia de paso. Esta liña deberíase completar no verán cunha liña cuxo destino foran as principais praias da zona: A Lanzada, Major, Montalvo, Areas, Area da cruz...
• Englobar dentro das políticas urbanísticas, o coidado da paisaxe e o respecto ás áreas de interese natural e patrimonial.
• Levar a cabo un plan de aforro enerxético para os nosos concellos, instalando luces de baixo consumo, evitando puntos de luz innecesarios, campañas de educación ambiental ao cidadá...
• En canto á xestión de residuos: a nivel comarcal o Salnés debería contar cunha planta de reciclaxe de entullos e outra da materia orgánica para facer compost. Esto permitiría reducir a cantidade de residuos producidos no concello (baixando así o custe do recibo do lixo), e darlle un novo uso aos residuos. Tamén é necesario ampliar o número de contentores de recollida selectiva, facendo principal fincapé no rural.
• Poñer en valor e protexer realmente os espazos naturais da nosa comarca, especialmente o Humedal Protexido Umia-O Grove, o noso litoral e os nosos ríos.
• Adecuar as depuradoras de augas residuais domésticas ás necesidades reais dos concellos, ampliando a rede de saneamento tamén ao rural.

Os responsables da implantación das políticas ambientais nos concellos deberían comezar, denantes de nada, a crerse que a conservación da natureza non é un escollo para o progreso, senón a base dunha boa economía e grande calidade de vida.
O CES sempre estará disposto a axudar nestes proxectos.

As plantas da area

2007-05-24T15:27:00.000+02:00

Itinerario botánico polas dunas de Area da Cruz
O sábado 26 de maio, o Colectivo Ecoloxista organiza unha saída para coñecer as curiosidades das plantas das dunas da praia de Area da Cruz, no Grove da man do botánico e micólogo Jaime Blanco.
Quedamos frente ao instituto As Bizocas, na estrada da praia da Lanzada a San Vicente.
Levade roupa e calzado cómodos e vir protexidos contra o sol.
Non faltes!
Lembra:
Sábado, 26 de maio, ás 11 h. da mañá, frente ao Instituto As Bizocas do Grove na estrada da Lanzada a San Vicente.

Trinta persoas asistiron a actividade de anelamento

2007-05-01T23:04:00.000+02:00

Aves con anel, actividade de abril

2007-03-29T00:18:00.000+02:00

Data: sábado 14 de abril
Hora: 09:30. Debemos de quedar a unha hora tan temperán porque o ornitólogo que vai guiar a actividade colocará as redes a primeira hora da mañá e canto máis tempo estean as ves atrapadas nas redes, máis probabilidades haberá de que sufran danos.
Lugar: A cita é nas inmediacións da fábrica de Cerámicas Campo (Vilalonga - Sanxenxo).
Recomendacións: Leva roupa e calzado axeitados para andar polo campo e polo litoral e, se podes, leva uns prismáticos.
Será unha actividade práctica de anelamento científico de aves silvestres e estará guiada por Emilio Martínez Sabarís, ornitólogo con moitos anos de experiencia nesta técnica, socio do CES e membro do grupo de anelamento Anduriña. Os participantes poderán descubrir dun xeito práctico a metodoloxía que se segue para anelar as aves, así como coñecer os obxectivos que se perseguen cos anelamentos.

As actividades mensuais son abertas, e dicir, non fai falta ser socio. Por iso, se coñeces a algunha persoa allea ó Colectivo que puidera estar interesada, non deixes de invitala a vir.

Queremos saber como afectan os portos deportivos nos cetáceos. Bótanos unha man!

2007-03-28T15:41:00.000+02:00

Estudo da Afectación dos Portos Deportivos nos Cetáceos.
Este estudo está desenvolvido pola CEMMA (Coordinadora de Estudio dos Mamíferos Mariños) en colaboración co CES.
Localización: O Porto Deportivo de Sanxenxo foi elixido pola CEMMA coma zona piloto dun estudo posterior máis amplo.
Obxectivo xeral: Avaliar a incidencia da navegación recreativa sobre a conduta dos cetáceos
Obxectivos específicos:
- Estudar as distintas reaccións dos cetáceos fronte ás embarcacións
- Cuantificar o grao de incidencia das embarcacións na presenza dos cetáceos
- Comparar a interacción dos cetáceos e as embarcacións en diferentes situacións
- Comparar o comportamento dos cetáceos en ausencia e en presenza de embarcacións
Temporización: Os datos tomaranse os días 31 de marzo e 1,2,3,4,7 e 8 de Abril. Cada día tomaríanse datos durante 6 horas, divididas en dúas quendas de tres horas.
Metodoloxía de traballo:
(1º) Toma de datos. Tomaranse datos da actividade portuaria seguindo unha ficha que se aportará aos voluntarios, os cales estarán organizados en quendas e cada quenda precisará polo menos de dous observadores e un deles sempre será alguén con experiencia neste estudo, da CEMMA ou do CES. As observacións faranse dende o miradoiro de Barreiros (Sanxenxo).
(2º) Tratamento dos datos. Os datos recollidos serán tratados posteriormente pola CEMMA, que elaborará un informe.

Se queres participar como voluntario na toma de datos, apúntate para cubrir algunha quenda chamando o antes posible ao teléfono do CES 680 580 086 ou escribindo un correo electrónico a cesalnes@yahoo.es, co asunto “Estudo de Portos”. Deberás comunicar:
- Nome e apelidos,
- Un teléfono de contacto
- Preferencias de quenda(s) a cubrir.

Recibide agradecementos anticipados pola vosa participación nas actividades.

O Colectivo celebrou a súa asemblea anual na casa de cultura de Meaño

2007-03-26T00:35:00.000+02:00

O Colectivo Ecoloxista do Salnés celebrou a súa asemblea anual hoxe (domingo 25 de Marzo de 2007) en horario de mañá (de 12 a 14h) na casa da Cultura de Meaño, cedida para este acto polo Concello de Meaño.

A asemblea desenvolveuse no horario e na orde do día prevista. Así, tras a aprobación da acta da asemblea do 2006, o informe de contas e do balance de socios, procedeuse á presentación da memoria de actividades levadas a cabo polo Colectivo durante o ano 2006. Co fin de transmitir aos socios esta memoria dun xeito eficaz, proxectouse unha presentación multimedia das actuación levadas a cabo polo CES e elaborouse unha memoria impresa en papel onde dun xeito máis pormenorizado se explicaban estas actuacións.

Tamén na asemblea levouse a cabo unha renovación de cargos na Xunta Directiva, sendo substituído Víctor Caamaño, que ocupaba o cargo de Vicepresidente, por Raquel García, tras recibir o CES a solicitude de Víctor do seu relevo coma Vicepresidente da directiva. Tamén neste punto foi nomeada coma vocal da directiva a asocia Alba Hernández.

Como proxectos de futuro presentados pola directiva e complementados polas intervencións dos asistentes en Rogos e preguntas, decidiuse:

Continuar coas actividades de denuncia fronte aos actos que dende o movemento ecoloxista se perciben coma negativos hacia o desenvolvemento sostible, salientando tres aspectos principais: urbanización non respectuosa co medio e a paisaxe, alteracións nos cauces dos ríos e modificacións na dinámica das nosas costas.

Continuar coas actividades abertas mensuais que o colectivo, animado polo bo acollemento que teñen na comarca e por que contribúen a divulgar os valores naturais que encerra o Salnés.

Proseguir tendendo pontes e sinerxías con outros sectores sociais, colaborando con outras asociacións ambientalistas e doutra índole, participación nos foros sociais (Foro medioambiental de Sanxenxo e o foro da Axenda 21 da Mancomunidade do Salnés) e manter unha vía de comunicación con todas aquelas administracións con competencias na xestión ambiental na comarca.

Como proxectos de resultados máis concretos a directiva expuxo ante os asistentes os seguintes:

- Reeditar o libro “A enseada do Bao”, único libro editado ata o momento do Humedal Protexido Umia-O Grove, editado pola asociación pedagóxica do Salnés “Candea” coa colaboración do CES en 1991. Esta reedición persegue a actualización de contidos e aumentar o atractivo visual do libro.

- Elaborar un Plan de Restauración das barreiras de Rouxique, antiga zona de de extracción de arxilas situadas na costa de Vilalonga (Sanxenxo).

O Colectivo reúnese en Meaño

2007-03-20T21:35:00.000+01:00

Asemblea Xeral Ordinaria

Os socios do Colectivo vanse reunir
o domingo 25 de marzo
na Casa de Cultura de Meaño, ás 12:00.

Os puntos da orde do día serán
1. Lectura da acta anterior
2. Memoria anual de socios 2006
3. Memoria anual de actividades 2006
4. Memoria anual económica 2006
5. Renovación de cargos da Xunta Directiva: Vicepresidencia.
6. Proxectos de Futuro
7. Rogos e preguntas

Haberá un pincho de produtos ecolóxicos.

Balea a vista! Vixiando cetáceos desde a costa

2007-02-23T18:45:00.000+01:00

ACTIVIDADE SOBRE A REDE DE AVISTAMENTO DE CETÁCEOS
A CEMMA (Coordinadora para o Estudio dos Mamíferos Mariños) coordina unha rede de observación de cetáceos en toda a costa galega que na nosa comarca está atendida polo Colectivo Ecoloxista do Salnés.
O sábado 24de febreiro, o Colectivo Ecoloxista organiza unha charla na ermida da Lanzada na que un especialista nos explicará como está organizada a rede de voluntarios e os avances na investigación que, coas súas observacións,
se van conseguindo.
Despois da charla, faremos unha observación coa axuda de prismáticos e telescopios nun dos puntos establecidos.
Podes participar, non é preciso ser especialista.
Recorda, se tes prismáticos, tráeos.
Lembra:
Sábado, 24 de febreiro, ás 11:30 h. da mañá
na ermida da Nosa Sra. da Lanzada
ACTIVIDADE ABERTA E GRATUÍTA • NON É PRECISO SER SOCIO

Contra a caza do raposo

2007-02-15T21:42:00.000+01:00

O próximo domingo 18 de febreiro vai ter lugar no Carballiño a IV Copa de España de Caza de raposo.

Moitas asociacións ecoloxistas, ademais do movemento cívico Matar por matar Non estanse a mobilizar para intentar paralizar, de forma pacífica, a xornada de caza, así como evitar a súa realización no futuro.

Para elo, dende as 6 de mañán e ata a 1 da tarde, persoas da organización agardarán diante do concello do Carballiño para coordinar aos grupos de xente que vaian chegando.

Ao redor das dúas da tarde mobilizaranse de novo contra o campionato no Carballiño.

Se queres participar nos actos do próximo día 18 no Carballiño, podes apuntarte usando este cupón e entregándollo no Carballiño aos organizadores do Movemento Cívico.

Nome: Apelidos:
Domicilio:
DNI: Tlf:

Baixo a miña responsabilidade acepto participar nas accións do día 18 de febreiro de 2007 para dificultar a caza de raposo de forma pacífica sin causar danos a persoas físicas, animais ou propiedades

Estarei na porta do Concello de Carballiño ás horas (poñer hora entre as 06:00 e as 13:00) coa finalidade de incorporarme a algun operativo

Asinado:

En , a de febreiro de 2007

Para máis información, consultar aos grupos organizadores: Matar por matar Non, Adega, Verdegaia, Amigos da Terra, Ridimoas, Coto do Frade.

NA DEFENSA DUN LITORAL VIVO

2007-02-15T20:19:00.000+01:00

O CES forma parte, xunto con outros grupos ecoloxistas como Luita Verde de Cangas, da Rede Litoral Vivo. Na última xuntanza deste foro acordouse acudir á manifestación en Cangas para denunciar as irregularidades na construcción dun porto deportivo.

Por iso invitamos a tódolos interesados a participar na manifestación convocada polo Foro Social de Cangas, que terá lugar o próximo sábado 17 ás 17,00 horas na Alameda Vella de Cangas.

A continuación reproducimos a convocatoria que nos foi enviada coa petición de darlle a maior difusión posible:

Tras máis de 16 meses de resistencia pacífica á construcción
dun porto deportivo no Salgueirón (Massó), un proxecto envolto nunha chea de ilegalidades, queremos amosar o noso rexeitamento ante unha ACTUACIÓN XUDICIAL DE DÚAS VELOCIDADES:

Rápida contra os ecoloxistas e os veciños e veciñas de Cangas acusados do delicto de coaccións para paralizar as obras do porto deportivo, incluíndo a ameaza dunha actuación policial contundente.
Decenas de compañeir@s foron xa xulgados, outr@s agardan xuízos inminentes.

Lenta para todos os expedientes xudiciais e administrativos abertos contra os promotores do porto deportivo e contra a Autoridade Portuaria de Vigo.

Exemplos:

1 .- A demora de máis dun ano para resolver a petición de paralización cautelar das obras.
2 .- A ralentización do expediente aberto pola Fiscalía de Medio Ambiente por indicios de delicto contra a ordenación do territorio, falsidade documental e prevaricación (entre outros).
3 .- A falta de resposta de Costas á petición de apertura de expediente de deslinde que clarifique o rexistro como propiedade privada dunha finca de dominio público marítimo terrestre.

Se queredes acudir compartindo coche por aquelo de viaxar de forma máis sostible, podedes chamar ao 607351501 e intentaremos organizalo.

No DÍA DOS HUMEDAIS o CES reivindica a aprobacion do P.O.R.N. do Complexo Intermareal Umia-O Grove

2007-02-04T21:46:00.000+01:00

O Colectivo Ecoloxista do Salnés reivindica, con motivo da celebración o 2 de febreiro do Día dos Humidais, a aprobación definitiva do PORN (Plan de Ordenación dos Recursos Naturais) do Complexo Intermareal Umia- O Grove.

O Plan de Ordenación dos Recursos Naturais é un instrumento de planificación imprenscindible para determinar que actividades se poden realizar e cales non en calquera espazo protexido. A lei obriga a elaborar dito plan para calquera espazo protexido, e a administración autonómica leva máis dunha década afirmando que a súa elaboración e aprobación son inminentes.

Aínda que este espazo ten a figura de Humidal Protexido, a súa protección e conservación non poden ser realmente eficaces sen o dito Plan de Ordenación.

Proba delo é que en todo este tempo transcorrido, dito espazo leva sufrido gran cantidade de agresións de todo tipo: vertidos sólidos e líquidos, recheos, construccións ilegais e/ ou agresivas co entorno... …), e outros moitos ameazan con converterse en realidade (campos de golf, porto deportivo, calificación de solo urbanizable dentro do espazo protexido…).

Isto demostra que o grao de protección actual non é suficiente para a súa conservación real e efectiva, e así se pon de manifesto nos dous estudos do estado do litoral de dito espazo que no CES elaboramos nos anos 1999 e 2005.

O CES quere recordar que os humidais atópanse entre os ecosistemas máis produtivos, complexos e fráxiles do planeta, xogando un importante papel ecolóxico, económico e social. Así, cumpren funcións tan importantes como: reserva de biodiversidade, retención de sedimentos, filtración de tóxicos, suministro de auga, control de inundacións... Por elo se están tomando medidas tendentes á súa protección real a nivel internacional.

No noso caso, trátase dunha zona que ademáis de servir como área de descanso de case 200 aves migratorias, actúa como viveiro natural de inmumerables especies comerciais de moluscos, crustáceos e peixes, polo que sustenta gran parte das actividades pesqueiras e marisqueiras dunha ampla zona da Ría de Arousa.

Unha vez máis, o CES reivindica por escrito á Consellería de Medio Ambiente que dita aprobación sexa por fin unha realidade no ano 2007.

Propostas do Colectivo Ecoloxista do Salnes aos partidos políticos e listas electorais en materia de medio ambiente. Eleccións municipais. Maio 20

2007-01-25T20:32:00.000+01:00

Neste documento o Colectivo Ecoloxista do Salnés (CES) pretende presentar aos partidos que concorran ás eleccións municipais na comarca do Salnés unha serie de medidas e actuacións medioambientais, coa fin de que podan ser recollidas tanto no programa electoral como na actuación práctica, tanto dende o goberno como dende a oposición.

Estas medidas pretenden achegar alternativas realistas para abrir camiño, dunha vez por todas, cara un progreso ben entendido, onde os veciños do Salnés podan acadar altas cotas de nivel de vida sen merma da súa saúde ou da súa paisaxe. Por iso é preciso implantar nos concellos do Salnés unha xestión ambiental e unha política que minimice o deterioro ambiental que están a sufrir os ríos, o mar, o ar, a biodiversidade, a paisaxe e a riqueza cultural da comarca.

Así, as propostas presentadas non teñen un caracter innovador, pois nen tan sequera o eran cando as presentamos nunha carta similar co gallo das eleccións do 2003. Tristemente, moitas destas propostas seguen a ser precisas, polo que queda moito por facer no eido ambiental. Agardamos, pois, que estas ideas sexan recollidas e asumidas como propias polos partidos da comarca.

PROPOSTAS XERAIS. (Aplicables a todos os concellos)
Estas propostas parten das deficiencias xerais en tema de medio ambiente, observadas nos concellos do Salnés. A maior parte destas propostas poden ser levadas a cabo pola iniciativa de cada concello. Algunhas destas propostas só poderían levarse a cabo por medio dun organismo de ámbito administrativo máis amplo, como a Mancomunidade de municipios. Noutros casos sería preciso que os concellos ou a propia Mancomunidade exerzan presión ou soliciten as axudas convenientes a outras administracións de rango superior.

RESIDUOS
• Elaboración do Plan de xestión de residuos municipais.
• Establecemento dun plan de recollida de residuos agrícolas.
• Campaña de reducción de residuos e de consumo responsable que pode orientarse a asociacións de consumidores, amas de casa ou mulleres rurais e pode levarse a cabo mediante charlas e obradoiros.
• Posta en funcionamento dun plan de compostaxe de materia orgánica para levar a cabo na Mancomunidade do Salnés.
• Retomar campañas axeitadas de selección de residuos, que deben de ir orientadas ó vecindario e con especial incidencia ós sectores turísticos e hosteleiros.
• Aumentar o número de contentores de recollida selectiva, con especial incidencia nos núcleos rurais.
• Informar á cidadanía da existencia dos puntos limpos, concienciándolle da importancia da súa colaboración na adecuada xestión dos residuos, sobre todo os tóxicos e perigosos. A este respecto existen xa experiencias de puntos limpos móbiles, constando dun camión-remolque con distintos compartimentos debidamente identificados que fan unha ruta periódica polas distintas parroquias, achegando así o punto limpo ao cidadán.
• Creación dunha planta de trituración e reciclaxe de restos de obra, crucial para unha xestión apropiada dos residuos derivados da actividade turística crecente nesta comarca.
• Extensión do uso do papel reciclado en todas as dependencias dos Concellos e organismos vencellados. Estimulación do uso do papel reciclado mediante unha campaña informativa e subvencións da súa compra a organismos de carácter público de ámbito municipal ou comarcal.
• Implantar a separación do papel nas oficinas e dependencias municipais, colocando papeleiras adecuadas e realizando campañas de concienciación aos traballadores.
• Creación de ordenanzas para regular a recollida de lixo e a limpeza viaria.
• Esixencia aos promotores de construccións de máis de 25 vivendas (ou no desenvolvemento de PEI´s e SAUs) a contenerización de recollida selectiva para esas novas vivendas.
• Eliminación ou selado de todo tipo de vertedoiros incontrolados.
• Limpeza periódica de lixo nas praias, usando técnicas de recollida manual, respectuosas coa duna e coa praia.

De cara á campaña electoral solicitamos moderación no uso de papel

AUGAS
• Construcción ou redimensionamento de depuradoras de augas residuais. Dotación de medidas correctoras naquelas nas que a depuración presenta deficiencias. Implantación de tratamento terciario.
• Instalación de plantas depuradoras compactas e prefabricadas para a depuración de augas residuais domésticas de pequenos núcleos de poboación alonxados da rede de saneamento.
• Reutilización das augas depuradas para rega dos xardíns ou outras labouras.
• Separación de augas pluviais e fecais en todos os núcleos de poboación.
• Extensión da rede de sumidoiros para todo o rural habitado.
• Arranxo e dotación de sumidoiros e depuradoras de pretratamento en polígonos industriais e esixencia da dotación de medidas de depuración axeitadas en empresas que non contan con elas (fábricas de conservas, maquilas…)

CONTAMINACIÓN
• Esixencia ante as administracións competentes de controis periódicos de calidade de aire nos lugares próximos a distintos puntos de emisión.
• Vixiancia estricta dos vertidos directos ao mar e aos cauces fluviais.
• Control dos parámetros de calidade das augas nos mananciais, ríos e mar, especialmente preto das zonas de emisión. Estes controis deben de facerse públicos mediante informe anual que permita coñecer cales son os principais puntos negros e de cara a tomar as medidas necesarias para solucionar estes focos de contaminación.
• Medidas de reducción de contaminación lumínica.
• Elaboración de mapa de contaminación acústica. Dotación de pantallas acústicas (arborado) para os lugares de máis contaminación acústica. (Márxenes da vía rápida, polígonos industriais ou estradas con máis tráfico). Esixencia do cumprimento das normativas vixentes relativas á contaminación acústica.
• Esixencia estricta do cumprimento da normativa de actividades molestas, insalubres, nocivas e perigosas.
• Plan de control de contaminación de solos. Cunha especial incidencia nos terreos adicados á agricultura intensiva e de viñedos. O seu obxectivo debe ser o de valorar o estado das terras de cultivo e a súa adecuación para a producción de alimentos saudables.
• Plan de fomento de agricultura biolóxica.
• Moratoria para a instalación de novas antenas de telefonía móbil en núcleos habitados.
• Declaración de zona antinuclear para todos os concellos do Salnés.
• Creación por parte da Mancomunidade dun equipo de policía local especializado en vixiancia ambiental.
• Promoción do transporte público na comarca. Creación dunha liña de autobuses periódicas, sobre todo no verán, para o desprazamento a praias.

PAISAXE E PATRIMONIO NATURAL

• Inclusión nos PXOM de medidas tendentes a unha construcción en harmonía coa paisaxe.
• Plantación de árbores con criterios ambientais en zonas públicas urbanas.
Catalogación e preservación de árbores que polas súas características (porte, tamaño, especie, enclave...), deban ser conservadas.
• Compra progresiva ou expropiación dos terreos de dominio público marítimo terrestre para conservación ou uso público sustentable.
• Elaboración ou revisión no seu caso do plan de extinción de incendios de cada concello.
• Restauración das marxes dos ríos, permitindo a restauración natural ou mediante replantación de especies autóctonas de bosque de ribeira. Vixiancia destas zonas.
• Plan de restauración das praias e o seu entorno, afectadas por depuradoras, tendidos eléctricos, tubarias, aparacadoiros sobre zona dunar, invasión de flora alóctona...
• Recuperación ambiental de zonas degradadas como canteiras e barreiras.
• Esixencia de soterramento de cableado eléctrico de alta e media tensión, con medidas tendentes á minimización do seu impacto.
• Formación de pantallas arbóreas nas zonas de maior impacto paisaxístico: polígonos industriais, vía rápida, escavacións…
• Recuperación dos camiños antigos a pé. Dotación de carril bicicletas entre as principais vilas do Salnés e dotación de aparcamentos para bicicletas. Eliminación de vellas pistas e trazados para plantación de arborado e axardinamentos.
• Construcción e xestión do mantemento dun centro de recuperación de fauna silvestre e especialmente de mamíferos mariños (cetáceos, focas) e tartarugas mariñas.
• Solicitar ante a administración autonómica a declaración do Complexo Intermareal Umia- O Grove como Parque Natural.

EDUCACIÓN AMBIENTAL E INVESTIGACIÓN

• Creación dun centro de documentación e bibllioteca especializada no patrimonio natural e cultural da comarca do Salnés.
• Promoción de actividades de coñecemento e campañas de divulgación dos valores naturais e culturais presentes na comarca destinados aos propios veciños.
• Construcción e mantemento dun Centro de investigación dos fondos mariños para a Ría de Arousa.
• Construcción dun parque temático dos ecosistemas galegos, con plantación dos distintos tipos de bosques e de formacións vexetais conformadoras da paisaxe.
• Campañas de revalorización e coñecemento dos elementos naturais, paisaxísticos, históricos e culturais do Salnés.
• Elaboración e promoción a nivel municipal e comarcal dunha ruta da historia e da arte.
• Campañas educativas e informativas, para nenos e adultos, sobre sobre hábitos saudables para nós e a natureza: aforro enerxético, residuos, mobilidade urbán...
• Programas de educación para a paz, dirixidos a rapaces/zas e mozos/as en idade escolar.
• Organización ou subvención, ó longo do curso académico, de actividades de educación ambiental para alumnos de Infantil, Primaria, E.S.O., Bacharelato e Ciclos Formativos.
• Organización de cursos de formación e sistemas de certificación en ecoturismo, tursimo sostible e turismo de natureza, dirixidos aos hostaleiros.

ENERXÍA E RECURSOS
• Plan de aforro enerxético nas iluminacións públicas: dotación de lámpadas de aforro enerxético e reducción de intensidade lumínica ou supresión do alumeado público en horas de mínima actividade.
• Campaña de aforro de auga e enerxía eléctrica mediante difusión das medidas tendentes a diminuir o gasto así como subvención de sistemas de aforro nas casas.
• Eliminación das luces de sinalización das rotondas e sustitución por sinais con catadióptricos.
• Implantación nos edificios públicos dependentes dos Concellos de sistemas de calefacción de auga quente sanitaria, ou da piscina municipal, se a houbese, mediante enerxía solar térmica.
• Implantación de sistemas de xeneración de electricidade, previo estudo enerxético, nos edificios dependentes das administracións locais, mediante a colocación de placas solares nos tellados e fachadas.
• Construcción dunha planta de procesamento de residuos da broza dos montes, limpeza das fincas, restos de poda, etc., para O Salnés con producción de enerxía.
• Dotación de axudas ou facilidades para a construcción bioclimática e para a dotación de medidas de aforro enerxético. Publicitación das axudas e subvencións procedentes doutras administracións de cara a distintas medidas de aforro enerxético (enerxía solar, construcción bioclimática…).
• Utilizar os principios, técnicas e materiais da construcción bioclimática nas dependencias municipais de nova construcción.
• Ambientalización das festas, é dicir, reducción do alumeado propio das festas do Nadal, das festas patronais, das festas gastronómicas e de exaltación do viño; dotación e distribución axeitada dos contentores que permitan a recollida selectiva dos residuos, campañas publicitarias en papel reciclado e dimensionadas á difusión real da propaganda.
• Instar e ó mesmo tempo facilitar ás empresas de nova creación a que sitúen as súas instalacións nos polígonos industriais, e promover o desprazamento a outras empresas, especialmente as que realicen tarefas que poidan entrar dentro das definidas no regulamento de actividades molestas, insalubres, nocivas ou perigosas.
• Promoción desde os Concellos e desde a Mancomunidade dos productos de orixe galego, pois aforran gastos de transporte.
• Nos concursos públicos para a contratación de empresas adicadas á construcción de diversas infraestructuras públicas, priorizar aquelas que utilicen materiais de construcción que proveñan da reutilización ou reciclaxe de restos de entullos e asimilables.

Outros
• Construcción dun Refuxio para fauna doméstica onde se potencie a adopción dos animais alí recollidos e creación dun sistema de recollida de ditos animais en toda a comarca.
• Adopción de boas prácticas á hora de consumo de todo tipo de materiais nas dependencias municipais (compra verde).

PROPOSTAS PARA O CONCELLO DE CAMBADOS
• Redimensionamento e dotación de medidas correctoras para a depuradora de Tragove.
• Recuperación ambiental das canteiras do Monte do Rei.
• Solución definitiva das emisións de vertidos fecais no mar, como no caso da desembocadura do Umia, de San Tomé e do paseo marítimo.
• Plan de restauración da costa de Tragove, con medidas que melloren paisaxísticamente o entorno (adecuación das fachadas das depuradoras), plantación de pantallas vexetais, soterramento das líñas eléctricas, e correcta canalización e ocultación das emisións das depuradoras).
• Promover o plan de restauración paisaxística e ambiental da desembocadura do río Umia.
• Peatonalización total da praza de Fefiñáns e do seu acceso.
• Plan de ambientalización e de dotación de sistemas para minimizar o impacto ambiental do Polígono de Oubiña.
• Ampliación de parques públicos.

CONCELLO DE O GROVE
• Elaboración dun plan de recuperación das praias situadas entre Virxe das Mareas e Cantodorxo (Rons, Conroibo…) que contemple a correcta canalización e ocultación das emisións das depuradoras e construcción dun emisario; soterramento das liñas eléctricas, acondicionamento das fachadas das depuradoras, plantación de pantallas vexetais, redistribución dos accesos e aparcamentos.
• Dotación de medios para a depuración efectiva de augas residuais, en concreto no que se refire á depuradora de Balea. Esixir un correcto funcionamento e o redimensionamento da depuración da Toxa.
• Recuperación ambiental das canteiras.
• Rexeitamento á construcción dun campo de golf, e especiamente se este se pretende ubicar nun espacio protexido.
• Rexeitamento á construcción dun porto deportivo sen un axeitado estudo de dinámica do litoral.
• Vixiancia exhaustiva do litoral do Grove e paralización, denuncia e demolición das actuacións contrarias ás normativas urbanísticas.
• Recuperación e posta en valor dos xacementos arqueolóxicos do Grove.
• Campaña de educación ambiental para hosteleiros con facilitación de medios para a recollida selectiva.
• Implantación das empresas nun polígono industrial onde as condicións sanitarias e ambientais estean controladas e vixiadas constantemente.

CONCELLO DE SANXENXO
• Elaboración e posta en funcionamento dun plan de restauración e recuperación ambiental das lagoas de Rouxique e Fianteira.
• Recuperación da dinámica litoral de Baltar -Silgar- Os Barcos- Panadeira Lavapanos- Carabuxeira.
• Solicitude á administración competente da realización de controis exhaustivos de contaminación de aire a Cerámica Campo.
• Restauración e recuperación das zonas degradadas das dunas de Baltar, así como a preservación deste espacio natural ante calquera uso (instalacións fixas ou móbiles, e calquera tipo de evento deportivos ou festivo...) que impida a rexeneración de toda a superficie de duna secundaria.
• Redimensionamento dos sistemas de depuración de augas residuais do municipio.
• Continuar coas campañas de educación ambiental para hosteleiros con facilitación de medios para a recollida selectiva.
• Preservación e revalorización ambiental e turística mediante paneis informativos das zonas rochosas litorais urbanas de Portonovo.

CONCELLO DE RIBADUMIA
• Recuperación ambiental e natural das zonas degradadas das marxes do río Umia.
• Impulsar a compra do Pazo do Monte e os seus bosques asociados (Lois) para un centro de interpretación da natureza- aula de educación ambiental e granxa escola.
• Plan de ambientalización e de dotación de sistemas para minimizar o impacto ambiental do Polígono de Ribadumia.
• Creación de espacios verdes de uso público.

CONCELLO DE MEAÑO
• Arranxo do sistema de sumideiros do Polígono industrial de Meaño.
• Preservación da paisaxe natural próxima ao Espazo Protexido Umia-O Grove, con especial relevancia na zona da desembocadura do río da Chanca, retirando todo tipo de vertidos líquidos e sólidos presentes na zona.
• Restauración total da telleira de Dena, acondicionamento, limpeza e coidado da zona, así como a súa posta en valor cultural e turístico, con sinalización e paneis informativos sobre as actividades realizadas nela.
• Aumento do número de contedores de recollida selectiva na zona urbana de Dena, así como da periodicidade da recollida, especialmente no caso dos contedores de papel e vidro.
• Instauración de tratamento terciario na EDAR de Dena.

Este novembro aprendemos a cultivar cogomelos

2006-11-21T15:12:00.000+01:00

O sábado 25 de novembro, o Colectivo Ecoloxista do Salnés organiza un obradoiro sobre o cultivo doméstico dos cogomelos Pleurotus, no Instituto de Ensino Secundario Francisco Asorey de Cambados, ás 17:00 horas.
Non faltes!

Completadas en catro días as prazas para a actividade aberta de outubro

2006-10-21T11:26:00.000+02:00

O Colectivo Ecoloxista do Salnés organiza o sábado 21 de outubro unha nova Actividade Aberta. Estas actividades que se levan organizando dende anos atrás. cunha periodicidade mensual, teñen a fin de dar a coñecer a socios e non socios do CES, e para todas as idades, os recursos e os valores naturais e patrimoniais da nosa comarca.

O sábado farase unha actividade denominada “ Viaxe á enseada das aves”, en colaboración coa empresa de cruceiros Mares do Grove, a bordo do seu barco Neptuno Sub, para acercarnos á observación das aves dende o mar, cunha perspectiva pouco habitual. Así, as oitenta persoas que xa acadaron as plazas para participar, poderan disfrutar dunha viaxe dunha hora de duración pola Enseada do Bao, polas inmediacións da Toxa, Toxa Pequena e Bico da Ran, saíndo ás catro da tarde do porto de O Grove.

Esta viaxe pola enseada que representa o núcleo do Espazo Protexido Ons-O Grove, é unha ocasión para gozar tanto da paisaxe coma da visión das aves migratorias que agora comezan a achegarse ata as nosas costas, unha mostra máis da riqueza do noso mar.

O Neptuno Sub pon á nosa disposición material óptico para a observación de aves, así como guías de identificación

O interese que esta actividade despertou nos veciños da zona (as plazas quedaron cubertas en apenas catro días) lévanos a confirmar o gran potencial turístico que reportan os recursos naturais e os espazos protexidos do Salnés que, racionalmente explotados, poderían diferenciar e diversificar a oferta turística da zona.

Percorrido pola enseada das aves

2006-10-19T20:44:00.000+02:00

O sábado 21 de outubro, o Colectivo Ecoloxista do Salnés organiza unha visita guiada no barco de visión submarina “Neptuno” pola Enseada do Bao, cortesía da empresa "Mares do Grove".

O barco partirá ás 16:00 horas do peirao do Grove (embarcadoiro 6)
Duración aproximada: 1 hora e 15 minutos
Prazas limitadas
Actividade aberta e gratuíta

Atención: solicita información e inscríbete UNICAMENTE
por correo electrónico en: cesalnes@yahoo.es

A ampliación do paseo fluvial do Río Armenteira empezouse a facer antes da finalización do proceso de autorización de obra

2006-10-08T15:18:00.000+02:00

O día 13 de setembro de 2006 publicouse no BOP de Pontevedra a solicitude por parte do Concello de Ribadumia a Augas de Galicia para a autorización da continuación do paseo fluvial no río Armenteira, na parroquia de Barrantes, concello de Ribadumia, quedando aberto un período de 20 días para exposición pública e presentación de reclamacións.

Este tipo de paseos que achegan aos veciños e turistas os valores que encerran os ríos deben ser coidadosamente deseñados para garantir que o disfrute que se queira facer deste espazo natural non conleve un impacto ambiental neste ecosistema. Así debe poñer principal fincapé na non alteración nen das beiras, nen do bosque de ribeira nen de alterar o cauce natural do río.

O proxecto, denominado Paseo interpretativo cicloturístico por Ribadumia, ten o obxecto de acondicionar a área limítrofe ao regato Armenteira mediante a limpeza e acondicionamento de paseos para a protección das marxes do río.

A este respecto, o proxecto describe o tipo de obras e infraestucturas a instalar, que consisten principalmente na apertura dunha senda de xabre (zahorra) ao longo do río, que estaría complementada con pontóns sobre o río e pasarelas voladizas de madeira ancladas a muros de pedra situadas na mesma beira do río. Inclúe tamén a reposición e formación de muros e escolleras en bloque de pedra morena do país. Ademais faise a descripción técnica de cada unha das infraestructuras (medidas, materiais, medios técnicos...).

Membros do Colectivo Ecoloxista do Salnés puideron comprobar como, a pesares de atoparse en pleno período de exposición pública, o proxecto xa comenzou a executarse, estando xa implantada na zona a senda de xabre, así como a barandilla e farolas, polo menos nunha cuarta parte do percorrido proxectado. A xuzgar polo aspecto da senda e as plantas que xa medraron no xabre, esta obra pode levar xa meses executada sen os permisos de obra pertinentes. (adxuntase fotografías). Para O CES este feito, ademais de por de manifesto unha vez máis a pouca sensibilidade coa que se actua nas marxes fluviais da comarca, tamén significa unha falla de respeto ao proceso administrativo legal é á participación cidadá no proxecto. Por ilo O CES enviou o mércores 4 de outubro un escrito á delegación da Consellería de Medio Ambiente alertandolles do feito.

Aínda neste escenario de “alegalidade”, o CES tras consultar o proxecto e a zona afectada enviou o día 4 de outubro ao xefe de serviz de Augas de Galicia (demarcación galicia sur) as alegacións ao proxecto. A este respecto o CES basou as súas alegacións nos seguintes puntos:

a) Falta de detalles descriptivos na redacción do proxecto fai inviable a valoración precisa dos impactos ambientais das obras por parte do público que revisa o proxecto. Así, no proxecto, non veñen recollidos aspectos tan importantes coma:

• Especificacións dos lugares e percorridos exactos nos que se realizarán pasarelas en voladizoe as sendas.
• Con respecto aos muros de anclaxe das pasarelas non se indica se son de nova construcción ou non, e a súa ubicación.
• Grao de afectación ao bosque do río, da instalación das pasarelas voladizas, dos pontóns e das sendas.

c) A instalación de pasarelas, sendas e muros poden ocupar zonas onde aínda se conserva o bosque de ribeira, causando danos tanto ás árbores coma ao sotobosque. Sendo o bosque de ribeira importantísimo na dinámica do ecosistema fluvial (refuxios para a cría, fonte de nutrintes nos ríos, reguladores de variables coma a temperatura e luminosidade das augas,...) e que son as que mellor cumpren a función de protexer as marxes do río fronte á erosión, así como de regular as crecidas de caudal, evitando que sexan tan rápidas debido á súa capacidade de infiltración hacia os terreos colindantes. Está demostrado que a longo prazo os muros de pedra non contribúen á protección medioambiental das marxes do río, senon todo o contrario.

d) A instalación dos puntos de luz están calculados en demasía, “urbanizando” excesivamente esta paisaxe natural e provocando tamén variacións no ciclo de luz das especies naturais do ecosistema fluvial. O CES propón eliminar, alomenos, a metade dos puntos de luz a instalar e que o horario de acendido non sexa moi extenso. As farolas, ademais, poderían cumplir igualmente a súa función de sinalizar a senda sendo dunha altura moito menor (con 30 cm sería suficiente). Todas estas medidas evitarían efectos negativos sobre o ciclo biolóxico das especies fluviais e promoverían actitudes a favor da redución do gasto enerxético.

e) Non se recolle no proxecto medidas para previr o paso de pequenos vehículos a motor (cars, motocicletas,...) que causen contaminación acústica no lugar e problemas de seguridade vial cos peóns e ciclistas que visiten o lugar.

Así, o CES propón no seu escrito de alegación , ademais de correxir os puntos anteriormente descritos, que se abra de novo o periodo de exposición pública do proxecto unha vez modificado e complementado o proxecto.

O Salnés a 5 DE OUTUBRO de 2006

O Colectivo Ecoloxista do Salnés alédase de que se atalle a contaminación mariña provocada polo tiro ao pombiño

2006-10-01T15:42:00.000+02:00

O campionato do tiro ao pombiño deste ano, realizado sen autorización da Conselleria de Medio Ambiente, según un escrito remitido o 15 de setembro ao CES pola Dirección Xeral de Conservación da Natureza, foi motivo dunha pequena campaña promovida polo CES en xuño, onde o principal obxectivo era denunciar os efectos secundarios negativos que esta celebración provocaba sobre o Humidal protexido do Umia.- O Grove. Esta actividade, considerada polo CES como unha actividade de abuso, pois se tirotean a pombas mutiladas para entorpeceren o seu voo, está a encher o litoral da Toxa de milleiros de perdigóns de chumbo, que unha vez disolta no mar da ría contribue á contaminación por chumbo na vida mariña. Tamén os perdigóns son inxeridos polas aves migratorias que nos visitan cada ano, provocándolles a enfermidade do plumbismo e incluso a morte.

Ante este escenario de impacto ao medio e, non esquecer, de incumplimento da legalidade vixente (non se pode empregar chumbo nos humedais protexidos polo convenio Ramsar -RD 581/2001-, como é o caso do Bao, e a celebración do campionato sen as autorizacións administrativas necesarias), o CES felicítase da resolución da Consellería de Medio Ambiente, xa que é a súa obriga manterse alerta das infraccións ao medio e tomar cartas no asunto. Tamén nos felicitamos de que todos os actores implicados económicamente no evento, incluído o Concello, non fixeran oídos sordos ás advertencias da Consellería e se reuniran para, como eles din, “buscar solucións para conciliar a celebración da proba coa conservación do medio ambiente”, aspecto este que ata o de agora non se tiña en conta.

O CES considera moi importante que a Consellería de Medio Ambiente, no caso de que dita comisión de traballo acade atopar solucións de conciliación e o permiso para a celebración do campionato nos vindeiros anos, non baixe a vixiancia en canto ao cumprimento da normativa vixente durante a celebración da proba.

Mais o que o CES considera o avance máis importante das decisións tomadas pola Conselleria a este respecto é que a apertura dun expediente sancionador á empresa “Hostelera del Noroeste S.A.” por ter celebrado o acto sen autorización, e no que tamén se lle obriga á restauración do espacio afectado polo chumbo, tendo que recoller os perdigóns caídos no humidal. Sen dúbida, unha boa noticia para a Enseada do Umia-O Grove, que alo menos por unha vez parece estar protexida realmente e non só sobre o papel.

O Salnés a 30 de setembro de 2006

O Colectivo Ecoloxista do Salnés alega contra o PXOM de O Grove

2006-09-20T23:27:00.000+02:00

O Colectivo Ecoloxista do Salnés considera que certos aspectos presentados en agosto, na segunda exposición pública do Plan Xeral de Ordenación Municipal do 2006 de O Grove, representan un paso atrás na protección da zona litoral do Concello. No caso de non ter en conta as alegacións que o CES presentou, e de se levar a cabo os cambios de catalogación de certas parcelas litorais, estariase a alterar non só o equilibrio natural da zona, senón tamén a súa estética e paisaxe, valor este último moi valorado polo turista que escolle estas costas para veranear.

As alegacións presentadas polo CES ao PXOM xiraron sobre tres puntos clave:

1. O non respeto polos límites Rede Natura 2000 na zona de protección do Complexo Ons - O Grove
A modificación consiste na reducción da superficie integrada na Rede Natura, desafectando uns terrenos en San Vicente do Mar, para poñer no seu lugar solo urbano (PERI 15).
Así mesmo, en Ardia e nas inmediacións da praia de Carreiro (PERI 16) calificaron como solo urbán dúas parcelas integradas parcialmente na zona de protección rede Natura 2000.

2. O non respeto polos límites da Servidume de Protección de Costas
Estes límites de protección do noso litoral foron desplazados no PXOM nas inmediacións da praia do Carreiro ata facelos coincidir exactamente cos límites do PERI 16, sendo tamén reducidos na zona de Area Grande- Punta Barcala e en Ardia.

É importante destacar que os Concellos non teñen competencia para definir nin para alterar os límites da Rede Natura nen tampouco os límites da Servidume de Protección de Costas.

3. O Porto Deportivo previsto no Corgo

Para o CES, a inclusión do porto deportivo no PXOM é candomenos precipitado, pois ditas infraestructuras deben contar con Estudio de Impacto Ambiental positivo para a súa aprovación definoitiva. Este estudo debe valorar o impacto nas correntes mariñas costeiras e previr as posibles alteracións de deposicións de areas tanto nas praias coma nos bancos marisqueiros. Sen dito estudo non se debería recoller no PXOM.

Mediante o envio de alegacións ao Concello de O Grove e escritos ás administracións competentes con data do 11 de setembro ( ao Director Xeral de Urbanismo, ao delegado provincial da Consellería de Medio Ambiente e ao xefe de Servicio Provincial de Costas) o CES solicitou:
• Que se restablezan os límites oficiais da Rede Natura con todolos efectos que conleva para a ordenación do territorio este tipo de protección
• Que non se califique como solo urbano nin como PERI ningunha superficie incluída na Rede Natura
• Que se restablezan os límites oficiais da Servidume de Protección de Costas con todolos efectos que conleva para a ordenación do territorio a aplicación da Lei de Costas
• Que se prevea un Estudo de Impacto Ambiental do porto deportivo do Corgo

Para o CES o Río Umia debe integrarse na xestión do territorio

2006-09-07T22:30:00.000+02:00

A verdadeira catástrofe do río Umia, ao igual que todos os ríos e regatos do Salnés, é o xeito no que está a ser tratado e xestionado (como se se tratara dunha cloaca a ceo aberto) como se evidenciou estes días co vertido de Brenntag. O CES considera que esta empresa, ao igual que calquera outra, debería estar ubicada nun polígono industrial ben dotado de medios e de protocolos de actuación ante casos de perigo ás persoas e ao medio. Ese debería ser a razón de ser dos polígonos, e non as guerras entre os concellos para ver quen ten o polígono máis grande. Así os polígonos, ademais de aportar unha boa infraestructura e rede de comunicacións ao sector empresarial, deben aglutinar as empresas para minimizar o seu impacto no medio (un sistema de depuración de augas conxunto, evitar o impacto visual que ocasiona a dispersión de empresas e naves, plans conxuntos de emerxencias que complementen aos propios de cada empresa, facilitar o control ambiental e sanitario por parte da administracións...).

O Umia leva sufrindo dende anos atrás unha grande cantidade de impactos e vertidos, e sen que o feito de estar falando dun río-arteria que sirve de auga aos concellos do Salnés, pareza que importara nen ao sector empresarial nin ás administracións locais nin autonómicas. Esta situación levou ao Umia a sufrir altas concentracións de fosfatos, canalizacións, recheos, repetitivos e case periódicos vertidos contaminantes (domésticos e industriais) en distintos puntos do seu cauce (Ribadumia, Cambados,...). A aparición de peixes mortos, asfixiados pola reducción de osíxeno disolto que estes vertidos provocan xa non é unha estampa casual, senón algo que se está a facer moi común. Esta situación levou incluso á propia Deputación de Pontevedra a encargar un estudio onde se inventariaron 177 focos contaminantes; pero ahí parece que se quedou a cuestión, pois non se coñecen as medidas correctoras aplicadas ao respecto. ¿Quedámonos tranquilos localizando impactos e non se actúa para evitalos ou minimizalos? .

Ante o caso de contaminación que causou o incendio da empresa Brenntag, a rapidez de actuación a nivel técnico para controlar e neutralizar a contaminación foi crucial na eficacia que parece está a ter estas medidas de control. Mais este éxito da metodoloxía empregada non debe solapar os efectos negativos que está a ter este vertido e as propias medidas de control, que deben ser atalladas unha vez pase esta fase de decisións de emerxencia. A este respecto o CES cree que hai varios aspectos sobre os que administración debe actuar:

• Efectos na fauna e flora fluvial. A administración deberá facer un inventario e un análise de cantidades e especies máis afectadas, así como levar a cabo a retirada inmediata da fauna e flora morta, polo risco de ser inxerida por animais introducindo así o contaminante na rede trófica. Ademais debe ser analizado o comportamento dos anfibios e tamén, e de xeito pormenorizado, o impacto do vertido na poboación de lontras que existía nos arredores da zona afectada.

• Efectos nas ribeiras. As obras de canalización para abastecemento de auga potable ao lado da ribeira, así como os movementos de terra provocados pola construcción dos diques e balsas, debe analizarse o seu impacto e tomar as medidas oportunas para minimizar os seus efectos na vexetación de ribeira, crucial para a vida do río.

• Analizar as augas do tramo inferior ao contaminado, e varias estacións de mostreo dispersas dende a zona cero ata a desembocadura do Umia, para así valorar en conxunto o grao de eficacia da metodoloxía empregada. Non debemos esquecer que este río inflúe de xeito enorme na dinámica natural de toda a enseada do Bao, zona núcleo del espacio protexido como Lugar de Importancia Comunitaria do Complexo Ons- O Grove.

Máis alá das medidas de control puntuais que nos levou o incendio de Brenntag, a situación dos ríos do Salnés debe remover consciencias e dunha vez por todas levar a cabo unha ordenación dos usos das augas e das ribeiras dos ríos e regatos, así como perseguir xudicialmente a todos aqueles (particulares, empresas e mesmo Concellos) que vertan aos ríos sen previa e adecuada depuración, deixando atrás xa, dunha vez por todas, a política da vista gorda.

7 DE SETEMBRO DE 2006

O CES pregunta aos alcaldes do Salnés sobre o funcionamento dos puntos limpos do lixo doméstico

2006-08-02T16:26:00.000+02:00

O Colectivo Ecoloxista do Salnés está a pescudar sobre o funcionamento dos Puntos Limpos, lugares adaptados e adecuados ambientalmente para a recollida selectiva dos residuos perigosos e voluminosos de orixe doméstico, complementando así aos contenedores de recollida selectiva de materiais inocuos (vidro, papel, plásticos...)

Estes puntos, que deberían ser coñecidos e empregados por tódolos cidadáns que quixeran desprenderse de materiais perigosos, coma lámpadas fluorescentes ou pinturas, así coma mobles ou electrodomésticos, seguen a ser uns grans descoñecidos para os veciños, a pesar de levar anos inaugurados. Rapidamente asaltan as preguntas ¿a onde van parar eses residuos perigosos? ¿ao lixo normal, impedindo calquera xestión sostible deles? ¿aos nosos montes, regatos e recunchos do noso litoral? ...

A Consellería de Medio Ambiente, no seu Plano de Recollida Selectiva de Residuos Urbáns, tiña como obxectivo para finais do 2006, a implantación dun Punto Limpo por cada concello de máis de 5000 habitantes. Os concellos faríanse cargo da súa xestión e mantemento posterior.

O CES enviou o 11 de xullo unha carta a cada un dos Alcaldes-Presidentes dos Concellos de máis de 5000 habitantes da comarca do Salnés (O Grove, Sanxenxo, Cambados, Vilanova, Vilagarcía e Illa de Arousa) para interesarse e informarse do funcionamento destes Puntos Limpos. Os aspectos sobre os que o CES require información son:
• Dirección, nº de teléfono e horario no que permanece aberto.
• Persoal que o atende (dados cuantitativos).
• Tipo de sistema de recollida dos residuos (particular ou organizado polo concello).
• Destino do material almacenado, en especial dos residuos tóxicos ou perigosos.
• Tipo de información que se lles facilita aos cidadáns sobre a presenza e funcionamento do punto Limpo no seu Concello.
• Dados das cantidades recollidas (de cada tipo de sección de residuos) ata a actualidade no Punto Limpo do seu Concello.

¿De que vale instalar un Punto limpo se logo a xente non o usa e se sempre está pechado?. A responsabilidade da boa xestión dos nosos residuos é de todos, comezando por un mesmo, mais é responsabilidade das administracións locais e autonómicas, poñer os medios e ferramentas para poder facelo, así como informar e concienciar á cidadanía sobre a importancia que ten a súa colaboración.

24 de Xullo de 2006

As dunas de Baltar, segadas un ano máis

2006-08-02T16:18:00.000+02:00

O mes pasado o CES estivo a actualizar o inventario da flora das dunas de Baltar, a raíz do descubrimento de especies botánicas de gran valor coma o Carraspique (Iberis procumbens) planta protexida por ser un endemismo (área de distribución moi localizada) da costa atlántica da peninsula ibérica que, xunto coa lavanda (Lavandula stoechas) e a herba de namorar (Armeria sp.,) apareceu recentemente na zona ocupada pola pasarela antiga de Baltar. Este descubrimento fixémolo público á prensa o 26 de xuño.

A pasarela, agora retranqueada polo plan de mellora ambiental do Servicio de Costas, salvou a estas especies da súa desaparición na zona debido á protección que lle proporcionaba tanto das pisadas da xente coma dos cortes da desbrozadora que anualmente segaba as “malas herbas” da parte interna da duna.

Este ano, fai dúas semanas, as segadoras do concello de Sanxenxo volveron a golpear a flora das dunas, facendo caso omiso do citado descubrimento de plantas protexidas. O Concello segue a manter a actitude de anos anteriores, cando dicía que as dunas de Baltar xa non teñen valor florístico. Seguen así as dunas a ser tratadas coma unha zona de simple céspede dun parque urbán, sen aínda decatarse de que é un espazo natural e unha xoia botánica e paisaxística que recibe a todos os veciños e visitantes do pobo de Portonovo.

O CES está convencido de que cunha boa xestión do espazo, podería compatibilizarse a súa conservación e o uso con fins de ocio, desbotando dunha vez por todas actuacións nocivas coma os desbroces anuais ou o seu uso coma zona multiusos que alteran e impiden a recuperación da flora propia do lugar.

24 de xullo de 2006

Excursión anual: De Fisterra a Muxía

2006-06-18T10:24:00.000+02:00

O domingo 25 de xuño, o Colectivo Ecoloxista do Salnés fará a súa excursión anual polo occidente da Costa da Morte.
Coñeceremos esta abrupta paisaxe na que a pedra ten un papel protagonista, que alcanza tamén á mitoloxía e á relixiosidade.
Visitaremos o Cabo da Nave –o lugar máis occidental de Galicia–,
Fisterra e Touriñán e tamén a tranquila e pequena Ría de Lires.
Lembra levar a comida e roupa e calzado cómodos.
¡Anímate!
Saímos ás:
8:30 O Grove
8:50 Portonovo
9:15 Cambados
9:30 Vilagarcía
Podes comprar os billetes en:
O GROVE
Estanco nº 3
(R/Alexandre Bóveda, fronte ó Bar Giso)
Quiosco Antía (Praza de Arriba)
PORTONOVO
Quiosco de Mandita
CAMBADOS
Casa de Cultura de Fefiñáns
VILAGARCÍA
Librería Arousa (Edelmiro Trillo, 19)

Un endemismo escondido do pisoteo

2006-06-17T17:59:00.000+02:00

Desde hai anos o Colectivo Ecoloxista do Salnés está intentando defender a duna de Baltar ante numerosas agresións que a veñen degradando. Déronse demasiadas accións destructivas sobre a duna: desbroces, pisoteo, instalacións diversas..., aínda que tamén algunha positiva, entre elas o recente retranqueo da pasarela de madeira que significou o seu traslado alguns metros cara terra, así como a plantación dunha especie formadora de duna, o feo das praias, todo para permitir que a recuperación dunar fora maior e garantir así o perfil da praia.

Hai dous anos promovimos unha campaña intensa que pretendía facer entender aos veciños e ás administracións a necesidade de preservar os valores destas dunas. Previamente á campaña fixemos un estudo sobre esta duna, no que lle demos especial relevancia a un apartado referente á súa flora. Ao realizar un inventario exhaustivo da vexetación, comprobamos con certa decepción que faltaba una especie, quizais unha das máis simbólicas e representativas das dunas galegas, unha planta endémica (ou exclusiva mundialmente) do Oeste Peninsular que ademais, debido á destrucción sistemática das dunas nestas últimas décadas, xa desaparecera dunha boa parte dos areais galaico portugueses. Trátase do Iberis procumbens, ou carraspique, unha planta de duna, belísima. A mediados de xuño deste ano, na época de floración, demos unha volta polas dunas de Baltar, sin intención algunha, só para disfrutar das flores. A nosa sorpresa foi enorme. No espazo que deixou ao descuberto a antiga pasarela, apareceron catro especies propias de duna que non estaban no catálogo, entre elas a nosa super star "Carraspique". Ademais apareceu unha lavanda (Lavandula stoechas) planta que nesta zona só se atopa en dunas, a herba de namorar (Armeria pubigera) e o Othantus marítimo, unha fermosa plantiña de follas verde azuladas e flores en cabezolas amarelas. Estas especies puideron resistir a sombra da pasarela, pero non o pisoteo, o desbroce e a falla de sensibilidade que se tivo ata agora con esta duna. Protexidas baixo a pasarela agardaron anos. Parece que agardaron por nós e agora nos dan a alegre nova. Noraboa plantiñas, seguiremos loitando por vos.

UN DÍA (5 de xuño, día mundial do medio) E UN LIBRO (Árbores de Galiza)

2006-06-03T19:12:00.000+02:00

O próximo luns, 5 de xuño, "Día Mundial do Medio", realizarase ás 20 horas no IES Francisco Asorey (Cambados) a presentación do libro "Árbores de Galicia", publicado pola editorial A Nosa Terra e do que son autores varios socios do CES.
A presentación está organizada polo IES Francisco Asorey, pola Federación de Libreiros de Pontevedra e polo Colectivo Ecoloxista do Salnés.

A costa recuperable. Actividade mensual aberta maio

2006-05-23T20:50:00.000+02:00

O sábado 27 de maio percorreremos a costa entre Punta Cantodorxo e Virxe das Mareas, un fermoso tramo que combina praia, duna e lagoa costeira no concello do Grove.

Explicaremos o proxecto que o Colectivo Ecoloxista do Salnés presentou ao Ministerio de Medio Ambiente para, cunha pequena inversión, recuperar o seu alto valor paisaxístico e incrementar o atractivo turístico do Grove nunha zona moi próxima ao núcleo urbano. No último número do noso boletín, O Bugallo, podes ler máis detalles sobre este proxecto.

Quedamos o sábado 27 de maio, ás 5 da tarde, diante da Lonxa do Grove como punto de encontro, para despois ir nos coches particulares cara o tramo a percorrer.

Xa podes conseguir o Bugallo nº 33

2006-05-18T00:05:00.000+02:00

Xa podes conseguir nos lugares habituais de distribución o número de primavera da revista do Colectivo Ecoloxista do Salnés.

O artigo central, A GRIPE AVIARIA, realizado por Marta Prieto, explícanos con amplitude esta enfermidade.

Puntos de distribución:
No GROVE:
no quiosco Antía e no estanco da rúa Alexandre Bóveda.
En PORTONOVO:
na Librería Numara e no estanco
En SANXENXO:
na Librería Nós
En VILALONGA:
na Librería Vidal
En DENA:
na Librería Cousas
En CAMBADOS:
na Librería Ramón Cabanillas
En VILAGARCÍA:
na Librería Arousa

Abril: A ruta de Aldariz

2006-04-09T17:35:00.000+02:00

Máis de setenta persoas participaron o sábado 8 de abril na actividade aberta do Colectivo Ecoloxista.
Coa colaboración da plataforma RondaNon, que nos servíu de guía, camiñamos por algúns dos lugares que vai afectar este proxecto urbanístico polas parroquias de Padriñán e Bordóns.

Grazas Joaquín, sorte Marta

2006-04-09T16:33:00.000+02:00

A asemblea anual do Colectivo Ecoloxista do Salnés celebrada en Cambados representou, ademais dun repaso ao traballo de todo o ano do Colectivo, a renovación da Xunta Directiva que pasa a encabezar Marta Lois como presidenta e Víctor Caamaño como vicepresidente.
Na fotografía de esquerda a dereita, Óscar L. Pérez (secretario), Joaquín Rodríguez (presidente saínte) e Marta Lois (nova presidenta).

Asemblea anual do Colectivo: o 5 en Cambados

2006-02-25T13:30:00.000+01:00

O domingo 5 de marzo os socios do Colectivo Ecoloxista do Salnés reúnense na súa asemblea anual.
O Instituto Francisco Asorey de Cambados será o lugar da reunión, que se desenvolverá a partir das 11:30 (en primeira convocatoria, a segunda será as 12:00).
Faremos un balance do traballo feito no ano 2005 e renovaremos a Xunta Directiva.

Actividade de febreiro: as aves da enseada

2006-02-20T15:16:00.000+01:00

Este sábado, 25 de febreiro, as 10:30 quedamos no aparcamento de autobuses da Illa da Toxa (aldea comercial) para facer unha observación das aves da enseada do Vao.
Haberá guías de aves, binoculares e telescopios, e especialistas que nos axudarán a recoñecelas.
Se tedes telescopios ou prismáticos, traédeos.

A seba, unha fábrica de vida na ría

2006-02-02T14:44:00.000+01:00

O artigo central desta edición do BUGALLO fai un percorrido por esta fábrica de vida na ría. Analisa polo miudo todos os organismos que se agochan nesta selva no mar, cunha riqueza en vida similar aos arrecifes coralinos, aínda que en cores mais discretas. Tamén se trata do necesario equilibrio entre cultivos mariños como a ameixa e a seba.
Escrito por Victor Caamaño, con ilustración de Mon Daporta e Encarna González "Niño".

Trinta persoas participaron na actividade de "Digiscoping" na Illa de Arousa

2006-01-29T21:43:00.000+01:00

O frío intenso non impedíu que un grupo de interesados na fotografía da natureza se achegara a Illa de Arousa a escoitar una introducción práctica da man de Samuel Paz e os seus compañeiros do grupo de disgiscoping da asociación ecoloxista Illanatura.
Alí, explicáronos en que consiste esta novedosa técnica que aproveita as cualidades das cámaras compactas de fotografía dixital cos seus pequenos obxectivos e a capacidade dos telescopios para observación de aves. Deste xeito, coa axuda de distintos adaptadores, podemos realizar fotografías de aves e outros animais a grande distancia, sen molestalos.
Puidemos comparar os distintos telescopios, adaptadores e cámaras dixitais compactas, os problemas e vantaxes de cada modelo, e compartir a súa experiencia na fotografía de aves.
Gracias Samuel, Fran, Xoel…

A web de "Illanatura"
http://www.illadearousa.com/illanatura/
A páxina de Digiscoping de "Illanatura"
http://www.illadearousa.com/illanatura/Castellano/digiscoping.htm

camara dixital + telescopio = "DIGISCOPING"

2006-01-26T23:56:00.000+01:00

O “digiscoping”consiste en fotografar aves a distancia cunha cámara dixital acoplada a un telescopio terrestre.
Conseguimos un gran alcance sen molestalas.
O sábado 28 de xaneiro, ás 11:00 da mañá, asistiremos a unha sesión de fotografía da man dun especialista na Illa de Arousa.
Leva a túa cámara ou telescopio, o que teñas, e veremos como conseguir os mellores resultados.

Quedamos na entrada do espazo protexido de Punta Carreirón, Illa de Arousa,
ás 11:00 da mañá

cesalnes (arroba) yahoo.es

Actividade aberta e gratuíta.
Non é preciso ser socio.

O Bugallo 32 xa está nos quioscos e librerías do Salnés

2006-01-22T15:33:00.000+01:00

A partir do martes, 24 de xaneiro o novo número do Bugallo estará nas librerías e quioscos habituais.
No GROVE:
no quiosco Antía e no estanco da rúa Alexandre Bóveda.
En PORTONOVO:
na Librería Numara e no estanco
En SANXENXO:
na Librería Nós
En VILALONGA:
na Librería Vidal
En DENA:
na Librería Cousas
En CAMBADOS:
na Librería Ramón Cabanillas
En VILAGARCÍA:
na Librería Arousa

O tema central son as pradeiras de seba na ría, toda unha fábrica de vida que é analisada polo miudo.

2005-10-15T23:23:00.000+02:00

Benvidos ao blog do colectivo